Princi i Uellsit, Charles, i ftuar në një konferencë ndërfetare në Prizren, ka folur lidhur me përvojën e tij gjatë qëndrimit në Kosovë e Ballkan, duke rikujtuar vizitën e tij në Kosovë në vitin 1999, njëkohësisht duke dhënë mesazhe bashkëpunimi përmes faljes e pajtimit si rruga e vetme drejt një të ardhme më të të mirë.
Princi Charles edhe njëherë tha se nuk duhet bërë robër të historisë, por tha se ajo nuk duhet harruar po ashtu. Ai përmendi edhe bashkëbisedimet me familjarët e të pagjeturve në Kosovë. Rrëfimet e tyre, tha Princi Charles, po ia thyejnë zemrën atij.
“Kur erdha për herë të parë në këtë vend në vitin 1999, 17 vite më parë… dhunë, mizori e panevojshme dhe ishte bërë shkatërrim i qëllimshëm i trashëgimisë të secilit komunitet, pasuritë, objektet e trashëgimisë, reliktet më sekrete dhe historike. Gjithçka që do të ndihmonte të definohen komunitetet, për t’ju dhënë atyre atë ndjenjën e përkatësisë, që si qenie njerëzore na duhet ne të gjithëve. Thellë, pa ato rrënjë dhe pa atë ndjenjën e përkatësisë dhe domethënies ne jemi të humbur. Nuk e dimë ku të fillojmë dhe nuk dimë se si ta interpretojmë botën përreth nesh. Pa histori, po ashtu jemi të humbur, por njëkohësisht siç thashë ditë më parë në Beograd: Ne nuk mund të bëhemi të burgosur të historisë. Duhet të sigurohemi se e posedojmë, por jo të pushtohemi nga ajo”, tha Charles.
Duke folur për vizitat e tij tek komunitetet religjioze, Princi Charles përmendi po ashtu edhe rrëfimet e familjarëve të të pagjeturve. Ai tha se këto rrëfime po ia thyejnë zemrën atij.
“Jam shumë i lumtur se e pata mundësinë të shëtisë përreth dhe të vizitojë xhaminë dhe katedralen ortodokse dhe atë katolike dhe të dëgjojë rrëfimet e tyre. Dhe, çfarë dëgjova sot në Prishtinë, në shumë mënyra po më thyen zemrën. Këtë mëngjes dëgjova rrëfimet e disa familjeve që kanë humbur më të dashurit e tyre – personat e pagjetur. E di se ka shumë të tillë në këtë shtet. Më pyetën nëse mund të ndihmojë… shpresoj se do të mund të bëja më shumë për ta. Por, më duket mua, siç edhe është përmendur sot, se ka shumë vdekje dhe shkatërrim të panevojshëm në botë. E shohim çdo kund tash, edhe në Lindjen e Mesme. Është zemërthyese”.
Duke kujtuar vrasjen e xhaxhait të babait të tij, Lordit Mountbatten, dhe zemërimin që kishte ndjerë në atë kohë, Princi Charles tha se, edhe pse e kupton përvojën e hidhur të njerëzve, ai ka zbuluar se falja dhe pajtimi janë rrugët e vetme për ecjen drejt të ardhmes.
“Më kujtohet vrasja e xhaxhait tim, Lordit Mountbatten, përafërsisht 40 vjet më parë, dhe më kujtohet koha kur ndjeja zemërim të madh si reaksion i menjëhershëm. Por, pastaj e kuptova shumë shpejt se hakmarrja nuk është ajo që duhej, por është pajtimi dhe falja ajo që duhet të bëni… Por e kuptoj agoninë e madhe dhe përvojat e dhimbshme qe i kane perjetuar njerëzit”, tha Charles.
Në fund, Princi i Uellsit, Charles, tha se si rezultat i takimeve të tilla dhe të gjitha fjalëve të njerëzve të mrekullueshëm të Kosovës, vendi do të ketë një të ardhme të mrekullueshme, derisa shtoi se është krenar që Britania e Madhe ka dhënë kontribut në rindërtimin e Kosovës.
Kosovë-Princi i Uellsit viziton Shtabin e KFOR-it
Princi i Uellsit vizitoi sot shtabin e Forcës së Kosovës (KFOR) në Prishtinë. Ky ishte një nga angazhimet e fundit të Princit të Uellsit dhe Dukeshës së Cornwall-it në turneun e tyre në Ballkanin perëndimor.
Princi i Uellsit u mirëprit në kampin “Film City” nga Komandanti i KFOR-it, Gjeneralmajori Guglielmo Luigi Miglietta dhe Garda e Nderit e përbërë nga pjesëtarë të shërbimit të KFOR-it.
Gjatë vizitës, Princi vendosi lule në monumentin e pjesëtarëve që shërbenin në KFOR dhe tek 14 ushtarakët e Britanisë së Madhe të cilët paguan sakrificën sublime në shërbim të paqes gjatë operacioneve në Kosovë.
Kjo ngjarje u përcoll edhe nga Ambasadori i Britanisë në Kosovë, Ruairí O’Connell dhe nga përfaqësues të kontingjenteve të ndryshme ushtarake që shërbejnë në KFOR.
Princi i Uellsit i shoqëruar nga Gjeneralmajori Miglietta, takoi Gjeneralët e KFOR-it dhe përfaqësues të lartë të shteteve të ndryshme, si dhe pjesëtarët e kontingjentit Kanadez dhe Irlandez.
Princi i Uellsit vizitoi KFOR-in si pjesë e vizitës së Madhërive të tyre Mbretërore në Kosovë më 18-19 mars
