Ne nje interviste per “Koha Jone” ish-ministri dhe ish-deputeti Dritan Prifti shpjegon aresyet qe perse do ti humbase keto zgjedhje PS.
Pse mendoni se Albert Çaçi mund të fitojë për kryetar Bashkie në Fier?
Në Fier fiton e majta gjithmonë, por këtë herë kandidati i majtë është miku i grupit kanabist në Partinë Socialiste dhe nuk e duan të majtët. Albert Çaçi është socialist 24 karat, 3 mandate deputet i qytetit te Fierit dhe është i provuar që i shërben këtij qyteti. Armandon e bënë deputet, s’ka dhënë asgjë për Fierin. Nuk është Fierak me origjine dhe në Fier ka lënë emër të keq me korrupsionin në Gjyqësor.
Akoma mendoni se Tom Doshi ka të drejtë dhe se i kanë rënë në qafë padrejtësisht?
Tom Doshi ka thënë një të vërtetë të madhe, ka denoncuar një skenar të vërtetë vrasje. Të gjithë e besojnë këtë, përveç disa të paguarve të Lëvizjes Socialiste për Integrim.
A ju kanë prekur në çështjet e biznesit, si hakmarrje politike ndaj qëndrimeve tuaja?
Kanë mobilizuar struktura të tëra për të na sulmuar. Duan të na trembin me kallëzime të fshehta në Prokurori, por kjo është puna e tyre. Pengesa pa fund na nxjerrin në Komisionin Qendror të Zgjedhjeve për kandidatet e Partisë Social Demokrate, por kjo është shenjë dëshpërimi dhe fashistizimi.
Keni deklaruar se do riktheheni në politikë. A është kandidimi i Albert Çaçit nga ju në emër të PSD-së si test për të hyrë në PSD?
Mbështetja për Bert Çaçin është një testim që unë do t’i bej elektoratit për pas 2 vjetësh, për rikthimin tim në Kuvend dhe Qeveri me zgjedhjet parlamentare. Kam synim që në një Bashki të vetme, nga 6 në qarkun e Fierit të siguroj një mandat deputeti. Dhe do ta bej.
Me kandidimin, a kemi të bëjmë me një ndarje përfundimtare mes jush dhe PS-së?
Unë nuk kam lidhje me Partinë Socialiste. Jam i ndarë. Punoj në këto zgjedhje për PSD në Fier. Mbase do vazhdoj me Partinë Social Demokrate dhe me tej. Mbetet për tu parë.
Kush i fiton këto zgjedhje?
Këto zgjedhje i fiton Partia Demokratike, si parti. Partia Socialiste do të humbasë rreth 300.000 vota. Për Tiranen akoma nuk kam ndjesinë e duhur kush fiton, por Partia Socialiste ka zgjedhur më të keqin. Erion Veliaj ka kundër bazën e Partisë Socialiste, sepse ai mori pjesë në rrëzimin e Qeverise socialiste në vitin 2005 me lëvizjen Mjaft. Kur të kem mendim të pjekur për Tiranën do t’ju them.
Redaksia Online
(JavaNews.al)
