Kryeministrja britanike, Theresa May, pritet të lajmërojë datën e largimit të saj nga detyra.
Sipas burimeve te cituara nga BBC, kryeministrja May pritet të paraqesë një afat kohor për zgjedhjen e pasardhësit të saj. Megjithatë, ende nuk ka pasur konfirmim zyrtar.
Ajo pritet të takohet me udhëheqësit e partisë së saj gjate dites se sotme. May ka qenë nën presion për të dhënë dorëheqje pasi disa deputetë të partisë së saj dolën kundër planit të ri të Brexit-it, të cilin May tha se do ta dërgojë për votim në parlament.
Që nga janari i këtij viti, parlamenti britanik ka hedhur poshtë tri herë marrëveshjen e largimit të Britanisë nga BE-ja.
Britania është dashur të dalë nga Bashkimi Evropian më 29 mars por kryeministrja, Theresa May, nuk arriti të bindë ligjvënësit britanikë për të votuar marrëveshjen e arritur me udhëheqësit e BE-së.
Megjithatë ajo arriti të marrë pajtimin e BE-së për shtyrjen e afatit të Brexit-it deri më 31 tetor, datë kjo kur Britania duhet të dalë nga BE-ja me ose pa marrëveshje.
