Gjatë fjalimit të fundvitit para deputetëve të Parlamentit të Maqedonisë, presidenti Gjorgje Ivanov e ka quajtur grup terrorist grupin e armatosur që u përlesh me policinë në Kumanovë më 9 dhe 10 maj, njofton korrespodenti i “Koha Ditore” nga Shkupi.
Sipas Ivanovit, pjesëtarët e grupit tanimë të arrestuar, kanë dashur të prishin rendin kushtetues në Maqedoni. “Të nderuar të pranishëm, me datë 9 maj, jeta në Kumanovë u rrezikua nga ekstremistë të dhunshëm dhe terroristë, të cilët erdhën për të prishur paqen, bashkëjetesën, demokracinë dhe rendin e Maqedonisë. Ata deshën që të shkelin integritetin territorial dhe të destabilizojnë shtetin.
Një kohë të gjatë kam paralajmëruar për këtë rrezik. Që nga fillimi i vitit, kërkuam ndihmë nga 17 shërbime të vendeve partnere nga Unioni Evropian, NATO dhe nga vendet e rajonit. Fatkeqësisht, këmbimi i informatave, me qëllim që të parandalohen grupi në qëllimet e tij, nuk dha rezultat”, tha Ivanov.
