Partia Socialiste mblodhi Kryesinë mbrëmje e së enjtes. Në mbledhjen e cila zgjati rreth 1 orë e 30 minuta u vendos data e mbledhjes së Asamblesë në të cilat do të miratohen vendimet e marra në Kongres.
Kryesia e Partisë Socialiste vendosi që të mbledhë Asamblenë në datën 7 maj.
Në mbledhje është diskutuar mbi procesin për zgjedhjen e Presidentit të ri, ndërsa janë dorëzuar propozimet e kandidatëve, anëtarët e Kryesisë që nuk janë deputetë.
Në Kryesi është diskutuar mbi profilin se si duhet të jetë Presidenti i ardhshëm, duke theksuar se Presidenti nuk duhet të jetë politikan aktiv.
“Kreu i ardhshëm i shtetit të mos jetë identifikuar me PS. Prioritet për kandidaturën i jepet atyre qe vijnë nga diplomacia dhe jeta akademike”, mësohet të jetë thënë në mbledhje.
Kujtojmë se në kongresin e Partisë Socialiste, të mbajtur në Tiranë më 9 prill, u miratuan edhe disa ndryshime në statut. U ndryshua mënyra e zgjedhjes së kryetarit të partisë në rang bashkie, ku për herë të parë do të merret mendimi i qytetarëve të zonës. Ndërkaq, u shkarkuan në bllok 61 kryetarët aktualë të PS në rang bashkie, dhe pritet rizgjedhja e tyre me rregulla të reja, për tu përgatitur për zgjedhjet vendore.
Për herë të parë krijohet një sekretariat ekzekutiv në nivelin e 61 bashkive, pra me zyra në çdo bashki, ku do të mbledhë dhe përpunojë informacione për llogari të PS-së në qendër. Informacioni i mbledhur do të ketë në fokus anëtarësinë, votuesit, problematikat, historikun e partisë në zonën përkatëse, sfidat zgjedhore etj.
Një sekretariat tjetër do të ngrihet për emigracionin, me qëllim për të afruar votën e emigrantëve dhe për të shtuar strukturat jashtë vendit. Ky sekretariat do drejtohet nga Laert Duraj. Do shtohet edhe sekretariati për çështjet ligjore dhe zgjedhore, në krye të të cilit u zgjodh Eridian Salianji.
Është marr vendimi edhe për ngritjen e një sekretariat për koordinimin, me në krye Blerina Gjylamenti. Ndërkaq, Blendi Klosi është zgjedhur sekretar për organizimin e Partisë Socialiste. Sekretare për Burimet Njerëzore është zgjedhur Anila Denaj. Sekretar për Digjitalizimin është zgjedhur Etjen Xhafaj, ndërsa Sekretare për Gruan është zgjedhur Etilda Gjonaj. Romina Kuko është zgjedhur Sekretare për Marrëdhëniet me Jashtë.
Gjithashtu, do të ngrihet një mekanizëm i ri, përmes të cilit të gjithë anëtarët e partisë do të japin opinionin e tyre për funksionimin e institucioneve vendore dhe qendrore me anë të fletëve sekrete./m.j
