Komisioni Qendror i Zgjedhjeve (KQZ) i Bosnjë-Hercegovinës vendosi të mërkurën unanimisht që t’i revokojë mandatin presidentit të Republikës Sërpska, Milorad Dodik.
Vendimi vjen pasi Gjykata e Apelit mbajti në fuqi gjykimin e mëhershëm ndaj tij për dënimin me një vit burg dhe qëndrimin gjashtë vite larg ofiqeve zyrtare, për shkak se presidenti nuk ka respektuar qëndrimet e Përfaqësuesit të Lartë ndërkombëtar për paqen në vend, Christian Schmidt. Dënimi me burg për këto raste mund të konvertohet në gjobë sipas sistemit ligjor boshnjak.
Dodik ka thënë më parë se do e apelojë vendimin e Gjykatës. Një periudhë apelimi rezervon edhe KQZ-ja, por nëse vendimi i sotëm do të rikonfirmohej, vendi pritet të shkojë në zgjedhje brenda 90 ditëve nga shpallja e tyre.
Presidenti serbo-boshnjak e ka nisur karrierën politike që në vitet 1980 si anëtar i Lidhjes së Komunistëve. Më vonë ai iu bashkua reformistëve përpara se të themelonte Aleancën e Socialdemokratëve të Pavarur. Ndër vite ai ka shërbyer si kryeministër dhe president i Republikës Sërpska, njëra prej dy krahinave kryesore të Bosnjë-Hercegovinës.
Të premten e shkuar, presidenti Dodik tha se do të kërkojë ndihmën e Rusisë dhe administratës amerikane për të zhbërë vendimin e Gjykatës.
