Kremlini thotë se komentet e Biden për Putinin përbëjnë “fyerje personale”
Deklaratat e presidentit amerikan, Joe Biden, për homologun e tij rus, Vladimir Putin, janë fyerje personale, tha të premten zëdhënësi i Kremlinit Dmitry Peskov.
Duke folur në drekën vjetore të Miqve të Irlandës në ditën e Shën Patrikut në Capitol Hill të enjten, Biden tha se Putin ishte “një diktator vrasës, një bandit i pastër”, i cili po bën një luftë imorale kundër popullit të Ukrainës.
Peskov shtoi se ai nuk donte të reagonte ashpër ndaj këtyre deklaratave duke pasur parasysh “irritueshmërinë, lodhjen dhe harresën” e Biden dhe në mënyrë që “të mos shkaktonte më shumë agresivitet”.
Komentet e Biden, të enjten erdhën një ditë pasi ai e quajti për herë të parë Putinin një kriminel lufte – një përshkallëzim i rëndësishëm në retorikën e tij që dënon veprimet e liderit rus kundër Ukrainës.
Peskov u tha gazetarëve të enjten se komentet e Biden ishin “absolutisht të papranueshme dhe të pafalshme”.
/a.r
