Në Gjykatën e Brukselit vijoi të enjten procesi ndaj nëntë personave të akuzuar për vrasjen e Ardit Spahiut, krim i ndodhur më 27 nëntor 2020 në Molenbeek. Gjatë seancës së paradites, para trupit gjykues u paraqitën disa dëshmitarë kyç.
Mes tyre ishte edhe partnerja aktuale e Franc Çopjas, i njohur në Belgjikë me mbiemrin Gergely, i dyshuar si porositës i vrasjes. Ajo dëshmoi përmes videokonferencës nga Emiratet e Bashkuara Arabe, duke e përshkruar Çopjan si një njeri besnik, “kurrë agresiv”, që sipas saj “nuk e ngrinte zërin para askujt”. Ajo deklaroi se nuk kishte dijeni për ndonjë veprimtari kriminale të tij dhe këmbënguli në pafajësinë e partnerit.
Më herët, një dëshmitar shqiptar nga Elbasani, qyteti i origjinës së viktimës, deklaroi se i njihte familjet Alibej dhe Copja, të përfshira në një konflikt të ashpër klanor që prej vitit 2018. Ai foli edhe për një përplasje të vitit 2017 në Elbasan, ku u përfshi Çopja, duke e cilësuar fillimisht si një sherr të vogël, por më pas pranoi se ishin përdorur edhe armë zjarri.
Në seancë dëshmoi edhe një ekspert i ADN-së, i cili konfirmoi se në vendin e krimit nuk u gjet asnjë ADN tjetër, përveç asaj të Ardit Spahiut dhe drejtuesit të automjetit ku ai ndodhej pak para vrasjes.
Ardit Spahiu u vra më 27 nëntor 2020, në një atentat në Molenbeek. Sipas raportimeve të mediave belge, atij iu bë pritë nga një person i maskuar dhe i armatosur me automatik me silenciator. Sipas dëshmitarëve, vrasësi qëlloi me breshëri ndaj Spahiut. Në vendngjarje u gjetën 17 gëzhoja dhe nëntë plumba goditën viktimën.
Hetimet e autoriteteve belge treguan se Spahiu ishte i përfshirë në trafikun e drogës, dyshohet një klani rival me Çopjat, një rivalitet që ka sjellë viktima edhe në Shqipëri.
