Lajm i mirë për të gjithë ata maturantë që aspirojnë të veshin bluzën e bardhë. Ndërsa kanë mbetur vetëm pak ditë kur kandidatët duhet të hedhin në letër dhjetë preferencat e tyre në formularin e aplikimit, Universiteti i Mjekësisë ka vendosur të bëjë një ndryshim në kriteret e pranimit të studentëve që pranohen në ciklin e parë.
Bëhet fjalë për mënyrën e përllogaritjes së notës mesatare, e cila me vendimin e ri nuk do të jetë mesatarja e ponderuar (për kredit), por mesatarja e thjeshtë aritmetike. Ndërsa përllogaritja e kësaj të fundit është shumë e thjeshtë, produkt i mbledhjes së të gjitha notave në përpjesëtim me numrin e lëndëve, nuk mund të thuhet e njëjta gjë për mesataren e ponderuar.
Ndonëse ka ende universitete që e ruajnë atë, ka shumë maturantë që nuk e dinë konceptin e saj. Numri i krediteve që një nxënës ka arritur të marrë për një lëndë shumëzim me notën e marrë duke i përpjesëtuar me numrin e krediteve që kanë të gjitha lëndët, përbëjnë notën mesatare të ponderuar.
Kjo nënkupton që kandidatët me nota të njëjta në lëndë të ndryshme do të kenë mesatare të ndryshme. Ky sistem përllogaritjeje që e ka hedhur poshtë Mjekësia, ruhet nga Universiteti “Ismail Qemali”, në Vlorë, në formulën e përllogaritjes së pikëve totale.
VENDIMI
Me një vendim të miratuar rreth një javë më parë, senati akademik i Universitetit të Mjekësisë e ka parë të arsyeshme të vendosë kriter mesataren aritmetike të thjeshtë, e cila ka 1/3 e peshës në përllogaritjen e pikëve finale për në universitet.
“Senati akademik i Universitetit të Mjekësisë, Tiranë, në mbledhjen e datës 21.07.2016 ka vendosur të miratojë ndryshimin e vendimit të senatit akademik nr.17, datë 08.03.2016, ku në zbatim të vendimit të Këshillit të Ministrave nr.407, datë 01.06.2016, hiqet kriteri i mesatares së ponderuar dhe vendoset mesatarja aritmetike e thjeshtë”.
Në vijim të vendimit citohet se pranimi i studentëve në ciklin e parë të studimeve Bachelor dhe në ciklin e dytë të integruar do të ndahet midis: notës mesatare aritmetike të thjeshtë të maturës shtetërore që ka 35% të peshës, po aq ka edhe mesatarja e viteve të gjimnazit, ndërsa 30% e zënë rezultatet e tri lëndëve: Kimi, Biologji e Fizikë. Gjithashtu, përveç notës mesatare dysheme, 6, që ka vendosur qeveria, Universiteti i Mjekësisë ka caktuar një mesatare të dytë si kusht për maturantët që aplikojnë.
Kështu, sipas vendimit të senatit, kandidatët që duan të pranohen në degët: Mjekësi e Përgjithshme, Farmaci e Stomatologji, duhet të kenë mesataren mbi 8.5. Gjashtë programet e tjera: Infermieri e Përgjithshme, Mami, Fizioterapi, Teknik laboratori, Imazheri e Logopedi kanë vënë kusht paraprak mesataren 8./panorama/a.k
