Tirana është trazuar nga lëvizjet e diplomatëve dhe krerëve të mazhorancës ndërsa takimet me të huajt kanë nisur qysh mbrëmë në darkë.
Ka qenë Edi Rama që pas dështimit të negociatave dhe refuzimit të Lulzim Bashës për çdo lëshim të bërë, vizitoi zyrat e Delegacionit të Bashkimit Evropian ku u takua me Romana Vlahutin.
Ndërkohë, e mërkura ka nisur me takime intensive fillimisht mes Edi Ramës dhe Ilir Metës në zyrën e këtij të fundit. Edhe kreu i KQZ është parë sot në ambientet e Kryeministrisë, ndërsa kujtojme se KQZ ishte një nga lëshimet që Rama i ka ofruar Bashës për garancinë e ruajtjes së votës.
Po sot, ambasadorja Romana Vlahutin ka mbledhur me urgjencë ambasadorët e vendeve të BE në Tiranë. Më pas ajo është parë të hyjë në zyrën e Ilir Metës nën shoqërinë e Benrd Boschradt dhe Donal Lu-së. Ky i fundit më parë u takua me kryeministrin e vendit.
Pavarësisht të gjithë këtyre lëvizjeve në vetëm pak orë, detaje nga takimet nuk janë bërë të ditura. Por refuzimi nga Lulzim Basha i marrëveshjes së propozuar dje nga David McAllister dhe Fleckenstein duket se kanë shtuar “ethet” në skenën politike. /javanews/b.d
