Kryeministri Edi Rama publikoi sot në rrjete sociale foto nga kantieri i punimeve që po vijon në Poligonin e parë publik të testimit praktik për Leje Drejtimi dhe Qendrës së parë Edukative Digjitale të Simulimeve Virtuale në Fushë-Prezë, Tiranë.
Rama shprehet se një sipërfaqe rreth 6000 m2 do të kthehet në hapësirë të teknologjisë dhe pikë takimi për aktivitete edukative për moshat e reja.
“Objekti i ri brenda kësaj qendre do të kthehet në një hapësirë të teknologjisë, pikë takimi për aktivitete edukative me moshat e reja si edhe stacion trajnimesh profesionale”, tha Rama.
Ky poligon është një tjetër vepër për standarde testimi transparente e në kushte sigurie manovrash, por edhe një qendër futuristike edukimi e formimi për kursantë e subjekte të interesuara për simulime reale dhe virtuale, ushtrime e prova të epokës digjitale, objektiv i Drejtorisë së Përgjithshme të Shërbimeve të Transportit Rrugor që bëhet realitet.
Një tjetër investim, 100 % nga vetëfinancimi i DPSHTRR-së që ka në fokus rritjen e cilësisë së procesit të Testimit për Leje Drejtimit, monitorimit dhe transparencës, modernizimit të proceseve të shërbimit që lidhet me autoshkollat dhe kursantët për lejedrejtimi.
Kompleksi me sipërfaqe rreth 6,000 m2 do të shërbejë edhe për Programe Edukative të Sigurisë Rrugore, orë Këndi Trafiku dhe Aktivitete Mësimore shtesë.
/s.f
