Personi i nxjerrë në foto nga policia si autor i mundshëm i grabitjes në degën e bankës te 21 Dhjetori është paraqitur në komisariat për të dhënë sqarime.
Bëhet fjalë për shtetasin E., Kodra, i cili i ka shpjeguar policisë se ai ka qenë te banka vetëm për të tërhequr pará nga bankomati.
Një ditë pas grabitjes së një banke të nivelit të dytë pranë zonës së “21 dhjetorit” në Tiranë, policia zbuloi imazhin e një personi duke shtuar se është një nga autorët, por pak orë pasi fotoja e tij bëri xhiron e mediave, ky person paraqitet në polici dhe mohon të ketë lidhje me grabitjen.
“Shkova tek bankomati për të marrë lekët. S’kam lidhje me grabitjen”.
Në foton e servirur nga policia personi ndodhet pak metra larg hyrjes së bankës, i pamaskuar, i veshur me një xhup lëkure ngjyrë kafe. Burimet pohojnë se fotoja e shkëputur nga filmimet e kamerave të sigurisë është realizuar pak minuta para grabitjes.
Në filmimet e kamerave të sigurisë dallohen dy grabitësit e armatosur dhe të maskuar, të cilët u larguan me motor.
Nga verifikimi i materialeve, rezulton se grabitësit u larguan pasi në bankë ra alarmi, pa mundur të hapin kasafortën. Në video duket momenti kur grabitësit largohen me shpejtësi në një rrugicë në pjesën e pasme të bankës.
Njëri prej grabitësve mban të veshur një xhup kafe, ndërsa tjetri të zi.
Në momentin e hyrjes në bankë ata mbanin shall dhe kapele për të mos u identifikuar, ndërsa brenda bankës kanë lënë edhe pistoletën me të cilën kërcënuan rojën.
Dy grabitësit morën paratë e kasës, pa mundur të arrinin te kasaforta, ndërkohë që harruan brenda edhe një armë.
BW/d.i.
d.i.
