Ndalohet një punonjës policie i Komisariatit të Krujës për shkak se akuzohet për falsifikim dokumentesh dhe shpërdorim detyre.
Shërbimi për Çështjet e Brendshme dhe Ankesat (SHÇBA) pranë Ministrisë së Punëve të Brendshme ka ndaluar ditën e sotme inspektorin Zenel Balliu, 57 vjeç, i cili në datë 31 mars 2016 ka plotësuar një procesverbal për shkelje administrative të një mjeti të parkuar gabim.
Më pas këtë fletë të konstatimit, nuk ia ka dorëzuar pronarit të mjetit, por pasi ka fshirë rubrikat, e ka plotësuar për një mjet tjetër dhe për një shkelje tjetër administrative.
Pas konstatimit të kësaj shkeljeje të ligjit, SHÇBA ka kryer verifikimet dhe ka ndërmarrë hapat ligjorë në lidhje me çështjen.
Materialet hetimore i kanë kaluar për veprime të mëtejshme Prokurorisë së Rrethit Gjyqësor Krujë për veprat penale të “Falsifikimit të dokumenteve“ dhe “Shpërdorimit të detyrës” në ngarkim të punonjësit të policisë Zenel Balliu.
