Edhe para goditjes pandemike, fisi Cherokee po përjetonte një krizë, zhdukjen e mundshme të gjuhës amtare.
Rreth 2000 njerëz të gjallë në këtë tokë mund të flasin rrjedhshëm gjuhën Cherokee. Dhe ndërsa Covid-19 filloi të përhapet, ky numër filloi të zvogëlohej.
Kështu që kur fisi Cherokee filloi të merrte dërgesat e vaksinës Covid-19, qeveria fisnore identifikoi folësit Cherokee si ndër grupet e para që kishin të drejtë për t’u vaksinuar.
“Kur ju humbni një folës dhe jeni një fis që ju kanë mbetur vetëm 2000 folës të rrjedhshëm, ju keni humbur diçka që nuk është thjesht e pazëvendësueshme, siç është e gjithë jeta, por është me të vërtetë një thesar kombëtar”, i tha CNN shefi kryesor Chuck Hoskin Jr.
“Nëse ata mbijetojnë dhe nëse i kalojnë njohuritë e tyre do të ndihmojë disa breza për gjuhën Cherokee”.
Vaksinimi i folësve të gjuhës Cherokee së bashku me punonjësit e kujdesit shëndetësor në vijën e parë janë vetëm përpjekja më e fundit që fisi ka bërë gjatë pandemisë për ta mbajtur të sigurt këtë popullsi të çmuar.
Dhe duke vepruar kështu, fisi Cherokee jo vetëm që mbron disa nga qytetarët më të nderuar, por gjithashtu siguron mbijetesën e kulturës dhe identitetit të tij.
Në terma relativë, fisi Cherokee Nation ka dalë shumë më mirë se fiset e tjera dhe shumë pjesë të SHBA në kontrollimin e përhapjes së virusit.
Fisi Cherokee me rreth 141,000 qytetarë që jetojnë në Oklahoman verilindore, ka raportuar gjithsej më shumë se 11,800 raste Covid-19 dhe 66 vdekje deri më 8 janar. Por rreth 30 nga njerëzit që kanë humbur jetën ishin folës vendas të Cherokee, tha Hoskin.
975 dozat e para të vaksinës Covid-19 të Pfizer arritën në fisin Cherokee më 14 dhjetor. Të nesërmen në mëngjes, fisi filloi vaksinimin e punonjësve të kujdesit shëndetësor në vijën e parë dhe tri ditë më vonë, filloi të administronte vaksinat për folësit e gjuhës Cherokee.
Më shumë se 600 folës janë vaksinuar deri më tani, sipas fisit. Qëllimi është të vaksinohen 1.000 deri në fund të javës.
Më 4 janar, fisi Cherokee Nation njoftoi gjithashtu se po fillonte vaksinimet për pleqtë e moshës 65 vjeç e lart.
Hoskin tha se ai ka parë disa hezitime midis qytetarëve të fisit Cherokee për marrjen e vaksinës. Por vendimi i fisit për të vaksinuar folësit vendas ndihmoi herët në lehtësimin e dyshimeve te disa njerëz.
/a.r
