Një operacion antidrogë i policisë së Fierit i koduar “Kreshpan”, ka zbuluar 13 kilogramë lëndë narkotike, duke vënë në pranga tre persona.
Pas hetimeve dhjetë ditore, gjatë kësaj të enjteje u bë arrestimi i E. Y., 35 vjeç, banues në Kreshpan, Fier; S. T., 38 vjeç, banues në Kreshpan, Fier dhe E. S., 27 vjeç, banues në Tiranë.
Si rezultat i operacionit, në aksin rrugor Levan-Tepelenë, shërbimet e policisë kapën në flagrancë shtetasit E. Y., S. T. dhe E. S., duke shkëmbyer një sasi lënde narkotike kanabis.
Gjatë kontrollit të ushtruar në automjetin tip Audi në pronësi të shtetasit E. S., u gjet një sasi prej 5 kilogramë lëndë narkotike kanabis, e cila dyshohet të jetë blerë te shtetasit E. Y., dhe S. T.
Gjatë kontrollit fizik, shtetasit E. Y., iu gjetën dhe sekuestruan 1 550 euro dhe 90 mijë lekë të reja, të cilat dyshohet se janë përfituar nga shitja e lëndës narkotike.
Gjithashtu, nga kontrolli i banesës së shtetasit E. Y., u gjet dhe sekuestrua në cilësinë e provës materiale rreth 8 kg lëndë narkotike kanabis.
Ndaj të dyshuarve hetimet janë në vijim, ndërkohë që materialet iu referuan Prokurorisë për veprën penale “Prodhimi dhe shitja e lëndëve narkotike” kryer në bashkëpunim.
/a.r
