Dy kandidatët e parë që po parashtrojnë platformat e tyre para komisionit parlamentar të ligjeve për Kryeprokuror të Përkohshëm Arta Marku dhe Arqile Koça, kanë vënë theksin tek reformimi i Prokurorisë duke e përputhur atë me reformën në drejtësi. I pari që ka paraqitur platformën e tij para anëtarëve të Komisionit të Ligjeve, ka qenë prokurori Arqile Koça. Ai është nga Devolli dhe ka punuar si prokuror në rrethet Devoll e Korçë, nga ku më pas është transferuar në Prokurorinë e Përgjithshme.
“Jam kujdesur për integritetin profesional dhe moral. Kam marrë pjesë në çështje të rëndësishme penale. Kam marrë pjesë në çështjen e Gerdecit, në atë të vrasjes së Azem Hajdarit. Sa i takon pozicionit për të cilin garoj, do të thoja se është me rëndësi që të ecet përpara me zbatimin e reformës në drejtësi. Prokurori i Përgjithshëm duhet të marrë kompetencat sa i takon zbatimit të Reformës në Drejtësi. Ajo që ka rëndësi është një përmirësim i bashkëpunimit mes organit të prokurorisë, policisë, dhe gjykatave”, u shpreh Koça.
“Për mua është me rëndësi integriteti moral dhe profesional. Principet kryesore që duhet të shoqërojnë një punonjës drejtësia është paanësia, dhe unë them që nuk kam ndonjë raport të tillë. Nuk kam ngrënë drekë me ndonjë politikan, në mënyrën sesi ju e shtroni pyetjen. Sa i takon ndonjë rasti ndërhyrje, është e vështirë, pasi ndërhyrja bëhet në forma dhe lloje të ndryshme. Në karrierën time kam patur çështje me sensitivitet të madh. Do konsideroja ndërhyrje çdo lloj publikimi, shprehje, qëndrimi publik, etj. Çdo prokuror e ndjen këtë, por nuk mund ta pranoj që ndonjë politikan më ka kapur për xhakete dhe më ka thënë bëj këtë apo atë. Ndërhyrje të drejtpërdrejtë nuk kam patur”, deklaroi ai.
Marku
Ndërsa kandidatja e dytë që ka prezantuar platformën përpara anëtarëve të Komisionit të Ligjeve ka qenë prokurorja e Shkodrës, Arta Marku. Ajo ka një eksperiencë prej 15 vitesh si zëvendësprokurore e këtij rrethi. Gjithashtu, Marku garon edhe për Këshillin e Lartë të Prokurorisë. Teksa ka paraqitur arsyet e pjesëmarrjes në këtë garë, Marku tha se beson tek transparenca e këtij procesi. Ajo tha se e sheh me rëndësi reformimin e sistemit të prokurorisë. Sipas Markut në sistem ka prokurorë me integritet dhe moral, të cilët mund t’i japin shumë vendit.
“Ka shpërndarje të pabarabartë të ngarkesës në prokurori. Vlerësimi nuk bëhet sipas meritës. Në sistem ka prokurorë me integritet dhe moral, të cilët mund t’i japin shumë vendit. Do bëj të mundur që përmes urdhrave dhe udhëzimeve të zbatohen drejt dispozitat e reformës në drejtësi dhe ligjeve të vendit. Nuk do ketë më komandime të prokurorëve pa kriter, pasi kjo e ka çrregulluar sistemin. Do të mundësohet ruajtja e sekretit hetimor. Dhe do përfaqësoj me dinjitet e integritet, institucion, dhe o mbaj marrëdhënie korrekte me të gjithë aktorët në vend dhe me ndërkombëtarët”, u shpreh prokurorja Arta Marku.
ma.me/javanews.al
