Tronditje historike e Lindjes së Mesme po fillon të tërheqë investitorët ndërkombëtarë, duke ‘u ngrohur’ nga perspektiva e paqes relative dhe rimëkëmbjes ekonomike pas kaq shumë trazirave, sipas “Reuters”.
Propozimi i presidentit Donald Trump që SHBA-ja të marrë kontrollin e Gazës mund të ketë paraqitur një problem të vështirë dhe të papritur – por armëpushimi në luftën Izrael-Hamas, largimi i Bashar al-Asaad nga Siria, një Iran i dobësuar dhe një qeveri e re në Liban kanë ushqyer shpresat për një ndryshim.
Egjipti, vendi më i populluar i rajonit dhe një negociator kyç në bisedimet e fundit të paqes, sapo ka menaxhuar shitjen e tij të parë të borxhit në dollarë në katër vjet. Jo shumë kohë më parë ai po përballej me një rënie ekonomike.
Investitorët kanë filluar të blejnë përsëri obligacionet e Izraelit dhe ato të Libanit, duke vënë bast se Bejruti më në fund mund të fillojë të rregullojë krizat e tij politike, ekonomike dhe financiare.
“Muajt e fundit në rajon, kanë vendosur një dinamikë shumë të ndryshme në skenarin më të mirë”, tha Charlie Robertson, një analist veteran i tregjeve në zhvillim në “FIM Partners”.
“Pyetja është nëse plani i Trump për Gazën do të ndez sërish tensionet”, shtoi ai.
Thirrja e Trump për të “pastruar” Gazën dhe për të krijuar një “Rivierë të Lindjes së Mesme” në enklavë u prit me kritika ndërkombëtarisht.
Duke iu përgjigjur planeve të Trump, Egjipti tha sot se do të presë një samit urgjent arab më 27 shkurt për të diskutuar ato që i përshkroi si zhvillime “serioze” për palestinezët.
“S&P Global” – agjencia e vlerësimit të kredisë – ka sinjalizuar se do të heqë paralajmërimin e uljes së vlerësimit të Izraelit nëse armëpushimi zgjat.
Agjencia e pranon kompleksitetin, por është një mundësi e mirëpritur pasi Izraeli po përgatit shitjen e parë të madhe të borxhit që nga nënshkrimi i armëpushimit.
I dërguari i Trump për Lindjen e Mesme, Steve Witkoff, tha se mund të duhen 10 deri në 15 vjet për të rindërtuar Gazën.
Ndërkohë, Banka Botërore e vlerëson dëmin e Libanit në 8,5 miliardë dollarë, afërsisht 35% e PBB-së së tij.
