Ish-presidentja e Kosovës, Atifete Jahjaga, ka reaguar e tronditur në lidhje me ngjarjen e rëndë të ndodhur në Kosovë ku një 11 vjeçare u dhunua seksualisht nga pesë burra.
Përmes një postimi në “Facebook” Jahjaga i ka bërë thirrje organeve të drejtësisë që të dënojnë autorët. Gjithashtu ajo u është drejtuar edhe organeve përkatëse të merren me rehabilitimin psikologjik të së miturës.
Në fund të postimit të saj ish-presidentja thekson se akte të tilla çnjerëzore nuk i kanë hije Kosovës, e cila ka mjaft plagë të hapura.
“E shokuar nga dhunimi seksual i një vajze 11 vjeçare në Kosovë.
Në atë moshë, kur vajza duhet të jetë duke e krijuar imazhin e saj për botën ideale, një sulm i tillë i lë pasoja të paimagjinueshme, me të cilat kjo vajzë, viktima më e fundit e një sulmi seksual, duhet të jetojë pëgjithmonë.
Andaj, i bëj thirrje organeve të drejtësisë që t’i dënojnë sulmuesit me të gjithë forcën e ligjit, ndërsa organet e tjera të merren me rehabilitimin psikologjik të viktimës, e cila ka nevojë më shumë se kurrë më parë ta shoh që shteti është aty për të.
Shoqëria jonë duhet t’i dënojë ashpër veprimet e tilla, si dhe të gjithë ne kolektivisht duhet të punojmë që viktimave tu japim gjithë mbështetjen e nevojshme.
Aktet e tilla çnjerëzore nuk i kanë hije Kosovës, kemi mjaft plagë të hapura. Dhuna ndaj grave e vajzave duhet të marrë fund një herë e përgjithmonë!”, shkruan ajo./m.j
