Edicioni i 7-të i “Për’puthen” do të rikthehet së shpejti në ekranin e Top Channel. Programi i dashurisë synon të mbajë sërish të angazhuar publikun shqiptar, si përpara televizorit, ashtu edhe në platformat online ku është i pranishëm Top Channel.
Produksioni ka zgjedhur shprehjen “Kapitull i ri” për fushatën promovuese në Instagram, duke nxitur interesin e audiencës për ndryshimet dhe risitë e sezonit të ardhshëm, i cili paralajmërohet me surpriza.
Një kast i veçantë pjesëmarrësish dhe karaktere të ndryshme pritet të sjellin dinamika të reja në program. Publiku do të ndjekë mënyrën se si ata do të njihen, do të përballen dhe do të ndërveprojnë nën praninë e kamerave, ndërsa produksioni vazhdon t’i mbajë të fshehta risitë e këtij edicioni.
Ndryshime ka edhe në përbërjen e ekipit kryesor. Heidi Baci do të drejtojë programin si moderatore, Erjola Doçi do të jetë opinioniste, ndërsa Drini Zeqo rikthehet në Top Channel pas plot 22 vitesh. Autor i “Për’puthen” do të jetë gazetari Ronaldo Sharka.
Ende nuk është bërë e ditur data e premierës, ndaj publikut i mbetet të presë edhe pak për rikthimin e programit.
