Kryeministri Edi Rama, në podcastin “Flasim” sot në 11 janar 2026, komentoi një sërë çështjesh të javës, që nga përmbytjet, e deri tek vizita në Paris.
Rama u shpreh se situatë aspak e mirë e motit ka qenë jo vetëm në Shqipëri, por në të gjithë rajonin. Sipas tij, falë edhe investimeve, qeveria shqiptare është e përgatitur dhe po i bën ballë përmbytjeve në mënyrë të suksesshme. Rama premtoi dëmshpërblim për të prekurit nga moti i keq.
Duke folur për pensionet, Rama premtoi se ato do të vijojnë që të rriten.
“U desh një përmirësim rrënjësor, në mbledhjen e administrimit të të ardhurave, u desh shumë, që në Shqipëri të ketë rritje pensionesh, pa rritur peshën mbi buxhet. Punuam përditë për kthesën që sapo ka nisur dhe më e mira është përpara për gjyshërit e këtij vendi”, u shpreh ai.
Kreu i qeverisë foli edhe për vizitën në Paris, ku mori pjesë në koalicionin e Vullnetmirëve për Ukrainën. Ai tha se në Francë u diskutua në lidhje me një plan paqeje, pas një lufte të përgjakshme.
“Kjo javë nisi me Koalicionin e Vullnetmirëve për Ukrainën, ku u bë bilanc për koordinimin e forcave dhe ndarjen e detyrave mes SHBA-ve, Koalicionit të Vullnetmirëve dhe Ukrainës, që të hapet rruga drejt paqes e kompromisit, për t’i dhënë fund luftës”, deklaroi Rama.
Kohët e fundit, një situatë aspak e favorshme e motit të keq, ka bërë që në vend të ketë përmbytje, nga veriu në jug të vendit.
