Pas viktimave të shkaktuara nga përmbytjet e një dite më parë në Malësinë e Madhe, ku babë e bir u rrëmbyen nga përroi i Bogës, ka reaguar edhe Instituti i Shëndetit Publik. Në një postim në rrjetet sociale, ISHP këshillon ndjekjen e disa rregullave gjatë përmbytjeve.
Ndër to është shmangia e bodrumeve dhe nënkalimeve, të cilat bëhen të rrezikshme gjatë përmbytjeve. Po kështu, ISHP apelon për të mos lëvizur me makinë në afërsi të këtyre zonave dhe në të kundërt nëse uji afrohet rreth mjetit këshillon braktisjen e tij dhe zhvendosjen në një pikë të lartë në mënyrë të sigurt.
Njoftimi i ISHP:
Shmangni vende të ulëta si nënkalime, bodrumet janë jashtëzakonisht të rrezikshme gjatë një përmbytjeje;
Mos ecni në zona të përmbytura, mund të jetë e vështirë të kuptoni sesa i thellë është uji dhe çfarë qëndron nën të;
Nëse duhet të ecni në ujë, ecni aty ku uji nuk lëviz, përdorni një shkop për të kontrolluar qëndrueshmërinë e tokës para jush;
Mos ecni me makinë në zona të përmbytura, nëse ujërat e përmbytjes zhvendosen rreth makinës tuaj, braktiseni makinën dhe zhvendosuni në një zonë apo pikë më të lartë në mënyrë të sigurt;
Mos prekni pajisjet elektrike, nëse jeni të lagur apo qëndroni në ujë.
/a.r
