Gjendja shëndetësore e aktivistes iraniane për të drejtat e njeriut, fituese e Çmimit Nobel për Paqen në vitin 2023, Narges Mohammadi, është përkeqësuar ndjeshëm, ndërsa familjarët dhe Komiteti i Nobelit kanë kërkuar transferimin e saj urgjent në një spital të specializuar.
Sipas familjarëve, 54-vjeçarja është dërguar nga burgu në veriperëndim të Iranit ku ishte, drejt një spitali lokal në një lëvizje të cilësuar si e vonuar dhe e pamjaftueshme. Vëllai i saj, Hamidreza Mohammadi, i cili jeton në Norvegji, ka deklaruar për BBC-në se ka frikë për jetën e saj, duke thënë se çdo ditë pret “telefonatën më të keqe”.
Fondacioni “Narges Mohammadi”, i drejtuar nga familja e saj, njoftoi se ajo u dërgua në spital pas një përkeqësimi katastrofik të gjendjes shëndetësore, pas më shumë se 140 ditësh ndalim të cilësuar si arbitrar dhe mungesës së vazhdueshme të kujdesit mjekësor të specializuar.
Sipas vëllait të saj, gjendja e aktivistes mbetet kritike, me tension të ulët dhe probleme serioze kardiake. Ai theksoi se për shkak të historikut të saj shëndetësor, përfshirë embolinë pulmonare dhe ndërhyrjet e mëparshme në zemër, trajtimi në spitalin e Zanjanit është i pamjaftueshëm. Për këtë arsye, ai kërkoi transferimin e saj në Teheran, ku mund të trajtohet nga mjekët specialistë që e kanë ndjekur më parë.
Thirrja është mbështetur edhe nga kreu i Komitetit të Nobelit për Paqen, i cili ka paralajmëruar se jeta e saj është në rrezik. Ndërkohë, familjarët akuzojnë autoritetet iraniane se po i mohojnë qëllimisht ndihmën mjekësore.
Autoritetet iraniane nuk kanë reaguar publikisht ndaj këtyre akuzave.
Narges Mohammadi është arrestuar 13 herë gjatë jetës së saj dhe është dënuar me gjithsej 31 vite burg dhe 154 goditje me kamxhik, sipas fondacionit të saj. Ajo po vuan një dënim për akuza që përfshijnë “propagandë kundër shtetit” dhe “bashkëpunim kundër sigurisë shtetërore”, të cilat i ka mohuar vazhdimisht.
Edhe pse ishte liruar përkohësisht për arsye shëndetësore në fund të vitit 2024, ajo vazhdoi aktivitetin e saj, derisa u arrestua sërish në dhjetor, pas një fjalimi në një ceremoni përkujtimore. Sipas familjes, gjatë arrestimit ajo u dhunua dhe më pas u dërgua në spital.
Në shkurt të këtij viti, një gjykatë revolucionare e dënoi me 7 vite e gjysmë të tjera burg për akuza të reja, ndërsa më pas u transferua pa paralajmërim në burgun e Zanjanit, ku komunikimi me familjen ka qenë i kufizuar.
