Prokuroria e Krimeve të Rënda kërkon dënimin me 11 vjet burg të Ervis Haskollit, i akuzuar si pjesë e grupit me shtatë persona që tentoi të trafikojë 2.6 kilogramë heroinë nga Shqipëria në Greqi.
Sasia e drogës është kapur në zonën e Kakavijës, në 16 prill 2014. Më herët Gjykata ka dënuar gjashtë persona të akuzuar për trafikimin e ngarkesës, të cilët pranuan gjykim të shkurtuar.
Ndërkohë i akuzuari i fundit, Ervis Haskolli, nuk e ka pranuar akuzën duke u gjykuar me proces të zakonshëm.
Në dosjen e paraqitur në Gjykatë, veç provave e dëshmive të tjera, ndodhen edhe përgjimet telefonike të bisedave që kanë zhvilluar mes tyre disa prej anëtarëve të grupit.
Sipas këtyre përgjimeve, organizator i trafikimit të drogës ka qenë një shtetas me emrin “Çimi”, me qëndrim në Greqi, i paidentifikuar plotësisht. (Panorama)
