Qendrat e votimit në Turqi, ku u votua për referendumin e ndryshimit të Kushtetutës, janë mbyllur në orën 17:00 me orën lokale. Kur kanë kaluar dy orë nga mbyllja e votimit dhe janë numëruar rreth 40% e qendrave të votimit, Po-ja ndaj Erdogan kryeson me rreth 60 %, ndonëse të dhënat janë vetëm paraprake. Referendumi parashikon një paketë ndryshimesh kushtetuese që i shtojnë kompetencat e pushtetit presidentit Reccep Tayip Erdogan.
Referendumi
Miliona turq iu drejtuan këtë të dielë kutive të votimit për të thënë fjalën e tyre në referendumin tejet polemizues për Kushtetutën e re, që e vesh me fuqi shtesë presidentin Recep Tayyip Erdogan.
Zgjedhësve u kërkohet të aprovojnë paketën reformuese prej 18 nenesh, të paraqitur nga Partia në pushtet për Drejtësi dhe Zhvillim, e cila do të zëvendësojë praktikisht sistemin e demokracisë parlamentare me atë të një presidence të fortë ekzekutive.
Një rezultat fitues “Po”, i cili kërkon shumicë të thjeshtë votash, do të shfuqizojë rolin e kryeministrit, duke lejuar kreun e shtetit të sundojë edhe me një aprovim minimal të Parlamentit.
Mbështetësit e Erdoganit argumentojnë se sistemi i ri do t’i sjellë vendit më shumë stabilitet politik dhe ekonomik.
Kush ka dalë në krah të kësaj ideje, këmbëngul se Turqisë i nevojitet një president me autoritet të fortë për t’iu përgjigjur sfidave që i kanosen vendit. Për kundërshtarët është e qartë se, një lëvizje e tillë do ta kthejë vendin në autokraci.
Erdogan, forca shtytëse pas ndryshimeve kushtetuese, pretendon se reforma do të sjellë eficencë në qeverisje dhe në përballimin e kërcënimeve si grushtshteti i dështuar i një viti më parë, apo rreziqet nga Shteti Islamik dhe separatistët kurdë.
Në bazë të propozimit, presidenti do të ketë autoritetin të emërojë ministrat, të hartojë buxhetin, të nxjerrë ligje përmes dekreteve presidenciale, të shpërndajë Parlamentin dhe të shpallë gjendjen e jashtëzakonshme.
