Përfundon takimi mes krerëve të kualicionit të mazhorancës. Në një prononcim për median Ministri i Ekonomisë Arben Ahmetaj tha se në diskutim është folur për zhvillimet ekonomike si dhe për buxhetin e vitit 2016. Ahmetaj tha se nuk do të ketë rritje të taksave, por përkundrazi, parashikohet ulja e taksave, sidomos në sektorin e bujqësisë.
“U fol për të gjithë zhvillimet ekonomike dhe u rakordua për politikat ekonomike e buxhetore për buxhetin e vitit të ardhshëm. Të gjitha propozimet janë të rakorduara dhe ka një qëndrim unitar… nuk do të ketë taksa të rritura, por patjetër që do të ketë taksa të ulura, sidomos në bujqësi.”- tha Ministri Ahmetaj.
Në takimin mes Kryeministrit Rama e kreut të parlamentit Ilir Meta ishin të pranishëm dhe një sërë ministrash të kabinetit, si dhe dy krerët e grupeve parlamentare.
Ky është dhe takimi i dytë që Rama e Meta kryejnë brenda pak ditëve. Në lidhje me “impulset” e reja për të cilat u artikulua sërish Meta, në takimin e shkuar, nuk pati asnjë deklaratë të re. Ndërkohë, në dalje, Kreu i grupit parlamentar të PS Gramoz Ruçi nuk ka preferuar të komentojë mbi takimin.
Sakaq, Ministri i Brendshëm Sajmir Tahiri është larguar më para nga takimi, pasi do të presë në ambientet e gardës së Republikës, Ministrin e Brendshëm Gjerman.
