Sonte në “Opinion”, 11 dhjetor, kryedemokrati Sali Berisha, foli edhe për ish-kryeministrin e vendit, Fatos Nano, i cili u nda nga jeta më 31 tetor të këtij viti.
Sali Berisha: Për të vdekurin, mirë ose hiç! Por dy gjëra mund të them, së pari ka merita të padiskutueshme, në reformimin e Partisë Socialiste, e cila nga parti e një njeriu që ishte gjer në momentin e largimit të tij, u kthye në parti me norma, votime, që ia ka hequr Edi Rama tani përsëri. Ai ishte në krahun tjetër, edhe ai një vektor i pluralizmit politik.
-Ju keni bërë marrëveshje të mëdha, në vitin 2022 ju jeni ulur për të zgjedhur Presidentin. Në vitin 2007, ju keni arritur të bëni marrëveshje, edhe në 1991-in…
Sali Berisha: Ai ishte politikan me reflekse dhe sigurisht kuptonte situatat. Nuk shtynte në…
-Ishte i vështirë në marrëveshje?
Sali Berisha: Nuk është se i merrte me kaq, me kaq…prokupim të madh!
-Ashtu ë? S’e çante kokën?
Sali Berisha: E thoshte shpesh këtë punën e përgjegjësisë, por nuk po hy në këtë kapitull.
-A jeni penduar që ai shkoi në burg gjatë kohës që ju ishit President?
Sali Berisha: Absolutisht nuk shkoi nga unë! E kam thënë 1 mijë herë, atij dosjen ja përgatitën në vitin 1991. U gjet se kishte firmosur diçka të cilin Ministri i Financave nuk kishte qenë fare i pranishëm, fjala për Qemal Dishën. Në këtë aspekt, kanë qenë debate në parlament. Tani, a e meritonte, a kishte korrupsion? 100%, s’ka diskutim! Por, ndërkohë një grup parlamentar, një grup i fuqishëm deputetësh kërkonin me çdo kusht arrestimin e tij dhe protagonist kryesor u bë Zef Brozi (Ish-kryetari i Gjykatës së Kasacionit). Ngrihet dhe thotë “ose ai, ose unë në burg”, janë dëshmitarët. Prokuroria e kishte dosjen, unë mund të kisha përdorur pas një kohe faljen presidenciale.
-Pse s’e përdore? Të shkoi ndërmend?
Sali Berisha: Patjetër, por mos harro se ishte betejë me komunizmin. Ne e ndalonim me ligj, ata shkonin dhe themelonin një parti komuniste.
