Nga Alfred Peza/
Dështimi i protestës së radhës së “Opozitës së Bashkuar” nëpërmjet bllokimit të 5 akseve rrugore të vendit, shënoi edhe zyrtarizimin e krizës së saj politike. Ka disa prova të qenësishme që e dëshmojnë këtë:
1.- Pas dështimit të asaj që dy muaj më parë cilësohej si “revolucion popullor”, u kalua tek termi i ri “mosbindje civile”. Edhe në këtë rast dështimi është i sigurtë, sepse si në rastin e parë ashtu edhe dje, është e qartë për të gjithë se edhe revolucionet edhe mosbindjen civile i bëjnë qytetarët. I bëjnë qytetarët e udhëhequr jo nga ish pushtetarët në hall, e as nga elitat politike të korruptuara e të kriminalizuara, por nga nevoja dhe revolta e tyre e brendshme, kundër pushtetarëve dhe klasës politike. Ndërsa dje ishte thjeshtë një lëvizje e opozitës kundër qytetarëve shqiptarë. Kundë atyre qytetarëve që ishin duke udhëtuar nëpër rrugët e bllokuara për hallin, qejfin, punën dhe biznesin e vet.
2.- PD është në krizë sepse sot, përveç të tjerash, ajo është më e përçarë se kurrë. Sot kemi një grup të ri parlamentar me deputetë të kësaj Partie në Parlament, ndërkohë që pjesa tjetër i dogji mandatet dhe ndodhet jashtë sistemit. Sot kemi një PD të re, me emrin Bindja Demokratike, me kryetar ish Nr. 2 të PD që ka qenë edhe Kryetari i Grupit Parlamentar të kësaj partie dhe rivali i Lulzim Bashës për kreu e saj. Sot kemi të tjerë deputetë nga listat e PD që janë futur e do futen në Parlament, ndërkohë që kjo parti doli edhe jashtë procesit të zgjedhjeve lokale të 30 qershorit. Sot kemi kryetar bashkish të kësaj partie që pritet të kandidojnë në këto zgjedhje apo ish deputetë të saj që janë regjistruar si kandidatë të pavarur për kryetar bashkie.
3.-Sot kemi një parti si LSI që iu plotësuan të gjitha vendet e lëna bosh në Parlament nga deputetë të listave zyrtare të kësaj partie. Sot kemi një LSI të demoralizuar totalisht. E pranuar kjo edhe me gojën e vetë Kryetares Monika Kryemadhi e cila deklaroi se “njerëzit e LSI duhet të zgjohen nga gjumi, jo duke ndejur me njëri-tjetrin… Duhet të takojmë njerëzit që kanë qenë viktima të makinerisë së propagandës së Edi Ramës”
4.- Sot kemi një “Opozitë të Bashkuar”, me 4 parti të tjera vetëm me kryetarë por pa anëtarë, që kërkojnë shpëtim herë duke kërcënuar me një 1997 të re dhe herë duke kërkuar tryeza nga Presidenti tani që u dogj afati i regjistrimit të tyre në KQZ.
Pas protestës së djeshme, aq pak interes publik kishte aksioni më i rëndësishëm i opozitës për këtë javë, sa asnjë prej emisioneve të debateve politikë televizive nuk u mor me të.
Kaq mjafton për të kuptuar se kriza politike e “Opozitës së Bashkuar” këtë radhës është jo vetëm e thellë, por edhe e pa shpresë.
