Qeveria ka parashikuar që të rrisë masën e pensionit për disa kategori të tjera profesionesh që klasifikohen si profesione të rënda. Ministria e Mirëqenies Sociale ka gati projektvendimin për ngushtimin e diferencave për pensionet e lidhura në periudhën nga viti 1993 deri në 1996.
Kategoritë që do të përfitojnë nga shtesa janë ish-punonjësit e industrisë metalurgjike, industrisë së naftës, tekstileve, tezgjahistë, saldatorë etj. Ky vendim vjen brenda një harku të shkurtër, pas atij të miratuar në muajin qershor të këtij viti. Për këtë kategori pensionesh, pra të llogaritura para ’96, Qeveria miratoi shtesë për ish-ushtarakët, minatorët dhe arsimtarët. Ndërkohë që është në prag miratimi një vendim i ri që e zgjeron rrethin e përfituesve. Ministri Blendi Klosi jep detajet jo vetëm për këtë vendim, por edhe për ndryshime të tjera që janë në proces.
KATEGORITË QË PËRFITOJNË
“Pensionet janë një nga çështjet që në Ministrinë e Mirëqenies Sociale dhe Institutin e Sigurimeve Shoqërore punohet intensivisht, vetëm me një filozofi dhe me një qëllim: të rrisim masën e përfitimit financiar për çdo pensionist, të zvogëlojmë pabarazitë e tmerrshme që gjetëm dhe të rrisim shërbimet kundrejt atyre që për vite me radhë kanë qenë kontribuues të rregullt në skemë. Aktualisht jemi në prag të miratimit të një tjetër vendimi, që në thelb ka rritjen e pensioneve për disa kategori të tjera pensionistësh, në kuadër të nismës sonë të madhe që përmenda më sipër, për korrigjimin e pabarazive në masën e përfitimit të pensioneve.
Kemi gati dhe do të miratojmë vetëm pas pak ditësh në Këshillin Administrativ të ISSH projektvendimin për ndryshimin e VKM nr. 409 ‘Për ngushtimin e diferencave në masën e pensioneve’. Në këtë projektvendim kemi parashikuar rritjen e masës së pensionit për disa kategori të tjera profesionesh që klasifikohen si profesione të rënda. Ndër to mund të përmend ish-punonjës të industrisë metalurgjike, industrisë së naftës, tekstileve, tezgjahistë, saldatorë, punëtorë ngarkim-shkarkim etj. Për të gjitha këto kategori pensionistësh do të ketë rritje të pensioneve, për të bërë përafrimin e tyre me kategoritë e tjera”.
SHTESA
“Sa do të jetë kjo masë, do të bëhet publike vetëm pas miratimit në Këshillin Administrativ të ISSH. Por ajo që mund të theksoj dhe konstatoj me shumë kënaqësi është mundësia që kemi tashmë falë performancës së mirë të skemës së pensioneve për të rritur pensionet, për të rregulluar pabarazitë, për të rritur shërbimet. Nuk duhet ta harrojmë që e gjetëm në skemën e pensioneve në prag falimentimi e rrezik në rënien e saj në kolaps. Tani që kemi hedhur themelet dhe ndërtuar strukturën e qëndrueshme, jemi në përmirësim të përditshëm të përfitimit dhe shërbimeve ndaj pensionistëve”.
LLOGARITJA
“Vendim tjetër me rëndësi është njohja e të drejtës së pensionit sapo ata kanë plotësuar moshën sipas përcaktimit ligjor për rastet kur qytetari i është drejtuar gjykatës për njohje të pensionit. Menjëherë nga njohja e pensionit me vendim gjykate, pensionistit do t’i rimbursohet masa e përfitimit edhe për kohën kur ka qenë në proces gjyqësor. Janë me mijëra pensionistë që, për shkak se ishin për vite në proces gjyqësor, nuk merrnin për këto vite pensionin, deri në vendimin final të gjyqësorit.
Kjo ishte një tjetër padrejtësi ndaj qytetarëve, që e trashëguam në këtë skemë nga paraardhësit tanë në pushtet. Mohimi i viteve të pensionit, jo për faj të tyre, ishte kundër çdo logjike ligjore dhe morale, ndaj një kategorie, siç e thashë më lart, kemi shumë detyrime, sepse kanë qenë kontributorët ndoshta më të rregulltit dhe më të ndershmit të këtij shteti. Dhe humbja e viteve të pensioneve ishte vetëm për shkak të katrahurës së dokumentacionit.
Jemi duke i dhënë fund njëherë e përgjithmonë këtij turpi që gjetëm në arkivën e ISSH, duke e informatizuar arkivën e Institutit të Sigurimeve Shoqërore. Informatizimi i Arkivës Qendrore për të dhënat e vjetërsisë në punë, si dhe informatizimi i proceseve të pranimit, caktimit, llogaritjes dhe pagesës së përfitimeve online, kanë dhënë frytet e tyre në luftën kundër informalitetit dhe në spastrimin e skemës së pensioneve nga praktikat e kundraligjshme dhe abuzive.
Krijimi pranë Arkivës e një strukture të re të certifikimit të periudhave të sigurimit duke totalizuar dhe shfrytëzuar të gjithë materialin arkivor e duke dhënë përgjigje shteruese për kërkesat për verifikim, do të sjellë përmirësime të ndjeshme të performancës së shërbimit, shkurtim të kohës së caktimit të pensionit, si dhe do të saktë- sojë administrimin financiar të fondit të pensioneve”.
PROCESET GJYQËSORE
“Kemi reduktuar numrin e proceseve në gjykatë, duke mos i ankimuar vendimet e shkallës së parë edhe në shkallë të dytë, që për mijëra pensionistë zgjaste procesin e përfitimit të pensionit. Kjo ka bërë që proceset gjyqësore për përfitimin e pensionit të përgjysmohen”.
KONTRIBUTET
“Është rritur interesi për t’u përfshirë në skemë dhe organizimi në mbledhjen e kontributeve të sigurimeve shoqërore e shëndetësore. Numri i kontribuuesve në skemë është rritur me rreth 200 mijë krahasuar me dy vite më parë dhe të ardhurat kontributive janë rritur me 15.5 miliardë, nga 51.3 miliardë që gjetëm në vitin 2013, në 66.8 miliardë në vitin 2016. Ky rezultat nuk është veçse reflektim i rritjes së besimit të qytetarëve shqiptarë. Është besimi i tyre se këto kontribute do t’iu kthehen si masë përfitimi mbi bazën e parimit të transparencës dhe ndershmërisë. Çdokush do të përfitojë sipas kontributit”.
PENSIONET E LIDHURA PARA ‘96
KATEGORITË QË PËRFITUAN NGA RRITJA E PENSIONEVE PAS KORRIGJIMIT TË BËRË NË QERSHOR TË KËTIJ VITI
Pensionet e pleqërisë të lidhura në periudhën 1993-1994
Arsimtarët
Minatorët
Ish-ushtarakët
KATEGORITË QË SHTOHEN RISHTAZI
Ish-punonjës të industrisë metalurgjike, industrisë së naftës, tekstileve
Tezgjahistë
Saldatorë
Punëtorë ngarkim-shkarkim
ma.me
