Emisioni i të shtunës “Artkand” me moderator Jetoni Koçibelli në Top Channal ka surprizuar me një të ftuar jo të zakonshëm për modelin e këtij emisioni. I ftuar me një pikturë të tijën ka qenë gazetari i njohur Martin Leka. Piktura që u ekspozua titullohet “Studio e piktorëve”, ku shfaqet Tirana e parë nga ballkoni i banesës së gazetarit që është ngjitur me studion e piktorëve. Piktura është një peisazh dekorativ, ku “Tiranën e dua si kjo pikturë”, u shpreh Leka.
Duke i patur fqinjë, Leka ka treguar edhe njohjen me dy prej skulptorëve më të njohur të kohës, Kristaq Rama e Mumtaz Dhrami. “Meqë ishim komshinj, shkoja shpesh në studio e tyre. E kisha për kënaqësi sepse kisha rastin të takoja ata që dikur në fëmijëri ishin për ne “idhuj” të artit”. Ndërsa ka treguar se shkon edhe sot në studion e piktorëve, ai i ka ka vlerësuar ata si njerëz të shkëlqyer dhe dinjitozë.
Me shumë emocion Martin Leka ka treguar gjatë bisedës me gazetaren Koçibelli dhe me profesorin e njohur Ardian Isufi edhe takimin e fundit me Skulptorin e Popullit, një ditë para se ai të ndërronte jetë.
“Atë ditë ndenja gjatë dhe Kristaqi po punonte një nudo. Do të ta bëj edhe ty një, më tha. Të nesërmen ika me pushime në Sarandë. Atje mora lajmin se kishte ndërruar jetë papritur. Më ngeli një peng i madh…”, tha M. Leka.
