Elton Hajri një nga pesë të arrestuarit si të dyshuar të përfshirë në pengmarrjen e 49-vjeçarit Jan Prenga, në Kamëz dhe më pas vdekjen e tij, mohon të ketë gisht në krim.
Kushëriri i vëllezërve Altin dhe Leonard Hajri, gjatë marrjes në pyetje pas arrestimit, ka deklaruar se nuk ka lidhje për ngjarjen.
Ai u arrestua pasi furgoni i fiksuar nga kamerat e sigurisë të resortit “Golden” në Xhafzotaj të Shijakut, rezulton në pronësi të tij.
Ndërsa furgoni është sekuestruar ai ka thënë para hetuesve se “Para katër vitesh kam punuar si kamarier tek kushërinjtë, por nuk kam lidhje apo dijeni për ngjarjen”.
Elton Hajri ka thënë gjithashtu se furgoni është i kushërinjve, por se ata e kishin regjistruar në emrin e tij, për shkak se kishin shumë mjete mbi emrin e tyre.
Gjithashtu 32-vjeçari ka thënë se nuk ka kryer kurrë krim në jetën e tij pasi nuk e lejon feja, “Jam besimtar i fesë islame dhe kurrë nuk kam bërë diçka që shkon ndesh saj”.
Si të dyshuar të përfshirë në rrëmbim dhe vrasjen e Prengës deri tani policia ka arrestuar Leonard Hajrin 36 vjeç, babanë e tij Bajram Hajri 64 vjeç, Elton Hajrin 32 vjeç, Festim Bexhdilin dhe Olsi Turjan 36 vjeç, të gjithë banues në Shijak.
Në një deklaratë lidhur me ngjarjen policia deklaroi pasditen e kësaj të enjteje se disponon prova të pakundërshtueshme se i Jan Prenga ka ndërruar jetë më datë 17 janar, ditën e rrëmbimit, dhe se në resort është dërguar pa shenja jete.
/a.r
