Presidenti maqedonas, Stevo Pendarovski nuk komentoi faktin nëse është e mundur një rënie e qeverisë për shkak të rastit ”Reket”, por personalisht konsideron se zgjedhjet e parakohshme nuk janë në interes të vendit deri në fund të vitit kur pritet integrimi i plotë i vendit në NATO dhe fillimi i mundshëm i negociatave me BE-në.
”Ajo është punë e njerëzve të cilët udhëheqin qeverinë dhe partive politike që e përbëjnë. Vlerësimi i tyre politik është më i rëndësishëm, ndërsa sipas Kushtetutës është e qartë – kush ka 61 vota nga 120 deputetë ai është në pushtet. Nëse duan të shkojnë në zgjedhje të parakohshme, sërish 61 vota e shpërbëjnë parlamentin”, deklaroi Pendarovski.
”Nuk e di se cilat janë planet e tyre nga kjo pozitë dhe nuk guxoj as t’i pyes. Nga pozita e presidentit i cili kujdeset edhe për integrimin euroatlantik që është edhe kompetencë, mendoj se minimumi derisa nuk i mbyllim këto çështje të rëndësishme deri në fund të vitit nuk do të duhej të shkojmë në zgjedhje të parakohshme”, shtoi ai.
”Dua ta shoh Maqedoninë e Veriut komplet të integruar në NATO dhe me negociata të filluara me BE-në. Ai është nga interesi i shtetit”, theksoi Pendarovski.
/a.r
