Jose Pekerman ka dhënë dorëheqje nga Përfaqësuesja e Kolumbisë dy muaj pasi e udhëhoqi këtë shtet drejt 16-të përfaqësueset më të mira të Rusisë, ka bërë të ditur Federata e Futbollit të Kolumbisë.
“Pas takimit me Jose Nestor Pekerman, trajneri ka bërë të ditur për dëshirën e tij që të mos vazhdojë të jetë në krye të ekipit përfaqësues. Federata e Futbollit të Kolumbisë ka qenë krenare që e numëron Pekermanin si përzgjedhës, i cili na kualifikoj ne në Botërorin e Brazilit dhe të Rusisë”, shkruhet në komunikatë, transmeton KTV.
Pekerman i cili e drejtoi ekipin që nga viti 2012-të, nuk pritej që të vazhdonte më shumë pasi u eliminua në Botërorin e fundit nga Anglia në penallti.
Koha e tij përfundon me 42 fitore, 20 barazime dhe 16 humbje në 78 ndeshje.
“Jam shumë i lumtur dhe gjithmonë e dëshiroj më të mirën për ekipin në të ardhmen. Nuk ka pasur mosmarrëveshje”, ka nënvizuar nga ana tjetër Pekerman në konferencën për shtyp.
69-vjeçari tani mund të jetë kandidat kryesor për vendet e lira që janë në Meksikë apo Argjentinë. Përzgjedhësi i përkohshëm Arturo Reyes do ta drejtojë Kolumbinë në miqësoret kundër Venezuelës në Miami më 7 shtator dhe Argjentinës në Neë Jersey, katër ditë më vonë, përgatiti Koha. (b.an)
