Ambasadorja e BE, Romana Vlahutin i ka paraqitur Komisionit Parlamentar të Integrimit progres raportin e KE për rekomandimin pozitiv për hapjen e negociatave.
Siç duket vizita e Vlahutin në komision ka bërë që opozita të thyejë bojkotin, pasi kishte paralajmëruar që këtë javë nuk do të merrnin pjesë në Komisionet Parlamentare.
Ambasadorja deklaroi se KE mendon se Shqipëria është gati për negociatat dhe kërkoi bashkëpunim pozitë-opozitë.
Vlahutin vlerësoi edhe marrëveshjen Rama-Basha, duke e cilësuar si model për rajonin.
“Marrëveshja e 17 majit, model për vendet e rajonit”, tha Vlahutin
“Duhet konsensus dhe punë e përbashkët në rrugën drejt BE. Duhet vullnet politik për finalizimin e reformave. KE mendon se Shqipëria është gati për negociatat. Bisedimet dypalëshe me Greqinë janë një zhvillim fantastik, ndërkohë që raporti vlerëson luftën ndaj drogës, krimit dhe korrupsionit. Raporti evidenton progresin në reformën në drejtësi“, deklaroi Vlahutin
Ambasadorja e BE theksoi se Ballkani Perëndimor mbetet sfidë për BE.
Ambasadorja paralajmëroi se sfidat që mbeten përpara janë akoma më të mëdha. Ajo përmendi zbatimin e ligjit antimafia, një ligj për financimin e partive politike, por kryesore mbetet ndëshkimi i korrupsionit në nivele të larta.
“Numri i ndjekjeve penale mbetet ende i ulët dhe kjo duhet të përmirësohet dhe kjo do të ndodhë kur të kemi SPAK-un dhe kur një pjesë e gjyqësorit të jetë rivlerësuar. Komisioni do të shohë me kujdes ndjekjet penale dhe dënimet për korrupsionin dhe kjo do të kërkojë një përpjekje të madhe”, deklaroi Vlahutin.
Javanews.al/a.ç
