Goditja e një bande të trafikut të drogës në Milano, ku u arrestuan rreth 31 shqiptarë, është bërë sot e ditur nga policia e shtetit, e cila në një deklaratë për shtyp së bashku me policinë italiane ka treguar për detajet e një operacioni që ka nisur që në shkurt të 2014.
Por pas kësaj ka reaguar PD përmes kreut të departamentit të sigurisë Enkelejd Alibeaj, i cili ka thënë se në një kohë që policia e shtetit krekoset për një aksion të drejtuar nga Prokuroria e Milanos, lind natyrshëm pyetja se ku ishte policia shqiptare, kur DEA dhe policia greke po hetonin Escobarin e Drogës.
“U krekosën sot para mediave, të besuarit e Tahirit, për një aksion anti-drogë të drejtuar nga Prokuroria e Milanos, në një përpjekje për të marrë merita në kohën kur ministri i brendshëm dhe drejtuesit e tij kanë imazhin më të keq ne Europe, pasi janë përfshirë në krime e trafik droge. Natyrshëm lind një pyetje: po kur u bë aksioni ndërkombëtar për Eskobarin e Ballkanit, ku ishte përfshirë dhe DEA amerikane, pse nuk dolën besnikët e Tahirit? Thjesht sepse ishin përjashtuar! Sepse partnerët i dinë lidhjet që kanë me Balilin, andaj i lanë jashtë. Edhe pse e kërkonte gjysma e policive të Europës, Balili arriti të arratisej nën hundën e Çakove dhe Çipave të Tahirit.”- shkruhet në reagimin e PD.
