Partia Demokratike ka reaguar sot në mbrëmje për publikimin e kontratës së lobimit me kompaninë amerikane ‘Continental’, me vlerë 6 mln dollarë për dy vite në këste 250 mijë USD çdo muaj.
Teksa pranon firmosjen e saj në këto shifra, në dokumentin e zbuluar ekskluzivisht nga Report Tv, Zyra e Shtypit e PD-së shprehet se “paratë do paguhen nga komuniteti shqiptaro-amerikan në SHBA, përmes fondacionit “Make Albania Great Again”.
Në 2017 PD pati një tjetër lobim në SHBA prej 500 mijë dollarësh, kur edhe atëherë selia blu tha se ‘paratë do paguhen nga shqiptarët që jetonin atje”. Mbi atë kontratë u hapën dy hetime penale në SHBA dhe në Shqipëri.
PD pretendon se ato para do paguhen nga shqiptarët e larguar nga vendi prej “regjimit të Edi Ramës”. Pavarësisht njoftimit, është hera e parë, që flitet për ekzistencën e një fondacioni të tillë, që nuk përmendet as në kontratën e lobimit, i cili është firmosur nga Flamur Noka në funksionin e Sekretarit të Përgjithshëm të Partisë Demokratike. Tani i takon Spak të vërtetojë natyrën e kontratës dhe orighinën e parave të cilat ndikojnë drejtpërdrejtë në fushanë zgjedhore në Shqipëri.
Njoftimi i plotë i PD-së për kontratën e lobimit:
“Ne lidhje mbi nje informacion te shperndare ne media per lobimin e PD prane Qeverise dhe Kongresit te SHBA deshirojme te sqarojme sa vijon:
Komuniteti shqiptaro amerikan permes fondacionit “Make Albania Great Again” ka kontraktuar kompanine “Continental” per te ndihmuar ne konsolidimin e mardhenieve miqesore te Partise Demokratike si forca me e madhe opozitare me Kongresin dhe Qeverine e SHBA. Synimi i bashkeatdhetareve tane ne SHBA eshte bashkepunimi i PD me aleatin kryesor te Shqiperise per te rivendosur demokracine funksionale dhe shtetin e te drejtes ne Shqiperi.
Kompania “Continental” drejtohet nga Ambasadori Carlos Trujillo i cili njihet gjithashtu dhe si avokat i Presidentit Trump dhe si antikomunist i palekundur ne qendrimet e tij!
Kontributi financiar per realizimin e ketij qellimi eshte marre persiper 100% nga patriote shqiptare qe jetojne dhe punojne prej dekadash ne SHBA, si dhe demokrate te tjere te larguar nga Shqiperia keto 10 vite, per shkak te regjimit te Edi Rames!
Partia Demokratike duke falenderuar demokratet antikomuniste te komunitetit shqiptaro – amerikan per bujarine dhe e patriotizmin e tyre, sqaron opinionin publik se ndonese ka dhene dakordesine per marrjen e ketij sherbimi ne perputhje te plote me ligjet e te dy vendeve, nuk ka asnje barre financiare apo detyrim kontraktual qe lind nga kjo marrëveshje”.
