Partia Demokratike njoftoi të dielën se ka përfunduar hartimin e 4 platformave të programit të saj. Përmes një njoftimi të shpërndarë për mediet, PD thotë se në krye të prioriteteve të platformave janë zhvillimi, punësimi, përmirësimi i jetës, ulja e taksave dhe thjeshtimi i procedurave. Po ashtu, janë prezantuar edhe platformat në fushën e sigurisë kombëtare dhe kulturës.
Sipas njoftimit, departamentet e Sigurisë Kombëtare, Financave Publike, Punësimit dhe Çështjet Sociale, Kulturës, Rinisë dhe Sporteve kanë zhvilluar diskutimet dhe konsultimet me anëtarët e departamenteve, deputetët dhe ekspertët e fushës. Më pas do të vijohet me procesin e tryezave publike mbi programin e PD.
“Departamenti i Financave Publike, gjatë prezantimit të programit u përqendrua në uljen e taksave me qëllim përmirësimin e klimës së biznesit dhe luftën kundër korrupsionit dhe informalitetit në Tatim-Dogana. Vendosja e taksës së sheshtë në nivelin 9% mbi të ardhurat dhe kontributet, ulja e normës së TVSH në nivelin 15%, eliminim i taksave të fshehta apo tarifave administrative paralele siç janë taksat mbi karburantet dhe ambientin dhe lehtësim të procedurave, parashikon platforma fiskale e demokratëve. Një prej drejtimeve kryesore të programit është reforma për zhvillimin e biznesit përmes politikave të reja të kreditimit të ekonomisë dhe transparencës on line të procedurave tatimore, doganore, etj”, bën të ditur PD.
Departamenti i Punësimit dhe Çështjet Sociale, sipas njoftimit të PD-së, u fokusua tek programi i punësimit dhe përmirësimit të cilësisë së jetës, nëpërmjet rritjes së pagës minimale dhe rritjen e masës së ndihmës ekonomike për shtresat në nevojë. Orientimet e programit të PD për këta sektorë, bëhet e ditur se mbështeten dhe në korrigjimin e skemës së kontributeve, duke eliminuar rritjen abuzive të kontributeve për profesionistët e lirë, ngritjen e skemave efiçente për shërbimet sociale për pensionistët dhe personat me aftësi të kufizuar.
Ndërsa sipas PD-së, departamenti i Kulturës, Rinisë dhe Sporteve diskutoi programin me ekspertë dhe artistë të njohur, duke u përqendruar në fuqizimin e institucioneve të artit dhe kulturës, rivitalizimin e monumenteve të trashëgimisë, ngritja e strukturave përgjegjëse për të drejtën e autorit, programet për rininë dhe hartimin e një strategjie me standarde evropiane për fuqizimin e saj, si dhe promovimin e sportit në të gjitha zhanret.
Platforma e sigurisë kombëtare, thotë PD, synon ti rikthejë Forcave të Armatosura statusin dhe misionin e tyre, sipas standardeve të Aleancës së Atlantikut, reformave të lëna pas dore dhe të kapura nga interesat klanore gjatë këtyre viteve të qeverisë së majtë.
