Reaksioni, lëvizjet dhe reagimet e shkaktuara nga lista ‘Basha’ po marrin një rrjedhë të parashikueshme. Garda e vjetër e Partisë Demokratike kërkon shkarkimin e kryetarit Lulzim Basha.
Pas shpërthimit me anë të deklaratave publike, të përjashtuarit nga lista kërkojnë të kalojnë në aksion konkret politik, me qëllim rrëzimin e Lulzim Bashës, i cili i ka prerë karrierën politike më shumë se gjysmës së grupit aktual politik. Lëvizja vjen pas një furtune reagimesh kundër Lulzim Bashës nga një rreth mbështetësish të Sali Berishës.
Ndërkaq, kundër elitës së vjetër janë ngritur mbështetësit e Lulzim Bashës, të përfshirë ose jo në listë. Përplasja vijon me intensitet në distancë, ndërsa nuk dihet nëse do të ketë matje forcash në forumet e larta të partisë.
Kërkohet shkarkimi i Lulzim Bashës
Kërkesa për shkarkimin e Lulzim Bashës është artikuluar dje gjatë një konference urgjente për mediat nga Arben Imami dhe Jozefina Topalli, i pari themelues i PD, ndërsa e dyta nënkryetare e PD për 17 vite. Ata akuzuan Lulzim Bashën se ka shpallur listën në shkelje të Statusit të PD. Në këtë kuadër, Arben Imami shtoi se lista e Bashës është e paligjshme.
Ai kërkoi mbledhjen e forumeve për të ndëshkuar Bashën. “Gjendja e krijuar pas publikimit të listave ka krijuar një shqetësim të madh, probleme serioze, reagim qytetar, të militantëve të partisë dhe të kandidatëve që janë në lista. Ne e kuptojmë që, mesazhi i tyre është se nuk mund të largohet Rama duke shkatërruar PD-në. Vendimi për këtë listë është marrë nga një njeri i vetëm, në shkelje të statutit, në shkelje të çdo procedure normale.
Është marrë në shkelje me ligjin pasi statuti i partisë është i regjistruar në gjykatë dhe ky fakt është nul. Zgjidhja e vetme në këtë situatë është mbledhja e forumeve të partisë dhe shkarkimi i personit përgjegjës, që është Lulzim Basha. I bëjmë thirrje Kryesisë të mblidhet pasi nuk ka më kohë. Në 26 qershor do të jetë vonë, pasi kjo listë është humbëse”, tha Imami.
Topalli lëvizje kundër Bashës
Jozefina Topalli, duke iu referuar listës së kandidatëve për deputetë, ka akuzuar dje Lulzim Bashën se ka zhbërë Partinë Demokratike. Ajo tha se lista është listë e familjes Basha. “Kjo listë është listë e familjes Basha. Është listë personale.
Ky është një moment kritik jo vetëm për PD-në, por dhe për Shqipërinë. Unë kam dyshuar se kjo nuk është më PD-ja e vërtetë, por tani jam e bindur për këtë. Kjo listë është lista e familjes Basha dhe e bizneseve të saj”, tha ajo. Topalli shtoi se ishte koha për të nisur një betejë kundër Lulzim Bashës, por edhe kundër Ilir Metës dhe Edi Ramës.
“Unë sot jam këtu për të thënë se është koha për të nisur betejën kundër Edi Ramës, Lulzim Bashës dhe Ilir Metës. Nuk mund të sundojnë vendin tre vetë që bëjnë garë apo lojë me njëri tjetrin kush të kapë më shumë nga ajo që është torta e pushtetit”, tha Topalli.
