Drejtuesi i Forumit për Dialogun Politik, Ermal Hasimja, tregoi në A2CNN detaje nga negociatat e zhvilluara me Sali Berishën.
Në emisionin Çdokënd me Merita Haklajn, Hasimja tha se Berisha është gati për të bërë lëshime për të bashkuar opozitën, duke nisur nga Kodi Zgjedhor.
“Në kushtet kur kam komunikuar me Partinë Demokratike, me zotin Berisha drejtpërdrejtë por edhe me të tjerë aty brenda kam vënë re që ka një gatishmëri për lëshime. Pse them lëshime? Sepse PD-ja është në një situatë pavarësisht pjesës që është në opozitë po konsumohet, po lodhet, po sulmohet. Është në një situatë ku nuk ja rrezikon njeri monopolin, ose pozicionin e rehatshëm që ka në opozitë. Domethënë nuk ka konkurrencë sot brenda opozitës. Kështu që dhe mund të dëshirojë ta mbajë atë. Në qoftë se heq dorë nga diçka do të thotë që po bën një lëshim dhe këtë lëshim po e bën pikërisht për çështjen e besueshmërisë. Dhe unë kur kam kërkuar dy-tre lëshime nga zoti Berisha i kam kërkuar në këtë lloj frekuence. Për kodin zgjedhor, është pika më e ndjeshme. Unë mendoj që PD-ja është e gatshme që të ulet dhe të diskutojë edhe për proporcionalin kombëtar”, u shpreh Hasimja.
