PD: Afera korruptive Meta-DIA thellohet nga deklarata e Ramës
Partia Demokratike deklaroi se sot skandali i rryshfetit të Ilir Metës u thellua edhe nga deklarata e Edi Ramës për ta mbuluar
Deputetja demokrate Jorida Tabaku theksoi se reagimi i kryeministrit sipas saj është i thatë dhe “sa për të larë gojën”. “Me anë të zyrës së tij, Edi Rama u mundua të komunikonte se avokatët e qeverisë në zyrën e Arbitrazhit në Vjenë nuk paskan përmendur emrin e Ilir Metës si përfitues të rryshfeteve në shuma të mëdha. Po çfarë kanë deklaruar zyrtarisht në fakt, të zezë mbi të bardhë Oliver Seyd dhe Tim Schreiber, avokatët e qeverisë shqiptare në dokumentin zyrtar drejtuar Arbitrazhit të Vjenës me datë 30 qershor 2015? Ata janë shprehur si më poshtë: DIA ka marrë miliona euro nga CEZ në atë kohë dhe i ka justifikuar këto shuma për rryshfete për zyrtarë të lartë, përfshirë një ish-kryeministër, i cili ka qenë nën akuzë më parë për korrupsion. Agjencia ndërkombëtare e lajmeve BIRN, që botoi këtë skandal, ka arritur në konkluzionin se ish-kryeministri që përmendin avokatët e qeverisë, i cili ka qenë nën akuzë më parë për korrupsion, është Ilir Meta”, deklaroi Tabaku nga selia e PD-së.
“BIRN flet edhe për rrethana të tjera që e lidhin Ilir Metën me DIA-n, si për shembull vajtjen e tij deri në Pragë në zyrat qendrore të CEZ për të lobuar që DIA, kompania që ka shpërndarë rryshfete, të kontraktohej për mbledhjen e borxheve dhe shërbime të tjera”, deklaroi Tabaku.
Ajo ka shtuar se, dokumente të siguruara nga agjencia BIRN dhe të publikuara në një shkrim të datës 3 qershor 2015 tregojnë se ish-drejtori i përgjithshëm i CEZ Shpërndarje, Josef Hajsek ka konfirmuar se Kastriot Ismailaj u rekomandua nga Ilir Meta, i cili u ofrua si garant i marrëveshjes.
