Presidenti i Serbisë, Aleksandar Vuçiç, ka ndryshuar qëndrimin e tij për vendimin e Gjykatës Speciale në Hagë ndaj ish-presidentit të Kosovës, Hashim Thaçi.
Ndërsa rreth dy javë më parë deklaronte se Thaçi pritej të lirohej nga akuzat kryesore, Vuçiç tha se gjatë vizitës së fundit në Paris ka marrë sinjale të ndryshme nga disa liderë evropianë dhe botërorë dhe se tashmë pret mundësinë që ai të dënohet rëndë.
“Para 15 ditësh mora informacion se ai do të dënohej me një masë që mbulon kohën e paraburgimit. Tani, kur isha në Paris dhe bisedova me disa liderë evropianë e botërorë, mora disa sinjale të ndryshme. Pas katër ditësh do të shohim se kush ka të drejtë”, deklaroi Vuçiç.
Presidenti serb komentoi gjithashtu protestat e së shtunës në mbështetje të ish-pjesëtarëve të UÇK-së në Tiranë, Shkup dhe Prishtinë, duke i cilësuar ato si “rapsodi të nacionalizmit dhe urrejtjes ndaj serbëve”.
Më herët, Vuçiç kishte deklaruar se një dënim eventual ndaj Thaçit mund të ishte i barabartë me kohën e kaluar në paraburgim, ndërsa për akuzat që lidhen me viktimat serbe ai kishte parashikuar një vendim pafajësie.
