Investimi në tituj qeveritarë po vijon të zgjojë interesin e qytetarëve dhe sipërmarrësve shqiptarë. Në ankandin e së martës, ndonëse qeveria kishte kërkuar 7,5 miliardë lekë, investitorët ofruan 10,4 miliardë lekë në bono thesari 12-mujore.
Ndërkoha, norma e interesit ranë 3,44 për qind nga 3,56 për qind që ishte në ankandin e mëhershëm. Të dhënat nga Baka e Shqipërisë tregojnë se në harkun e muajve janar-prill investitorët kanë kërkuar të blejnë bono thesari 1-vjeçare në vlerën e më shumë se 165 miliardë lekëve, ndërsa qeveria ka pranuar më pak se 114 miliardë lekë.
Në raport me katër-mujorin e një viti më parë, periudhë kohore gjatë së cilës qytetarët dhe sipërmarrësit kishin ofruar për të blerë bono në vlerën e pak më shumë se 152 miliardë lekëve, treguesi është rritur me 13,1 miliardë lekë.
Vitin e shkuar, qeveria ndërmori një fushatë duke ftuar qytetarët dhe sipërmarrjet të investonin në tituj me vlerë. Nga të dhënat rezulton se pjesa më e madhe, mbi 71% e parave janë investuar për të blerë bono thesari, ndërsa pjesa tjetër ka shkuar për obligacione.
Ekspertë të fushës ndërkohë paralajmërojnë se investimi në bono thesari mund të mos joshë më aq shumë, për shkak të rënies së normave të interesit.
/a.r
