Ish-kreu i Bindjes Demokratike, Astrit Patozi ka komentuar në edicionin qendror të lajmeve në “Vizion Plus” zyrtarizimin e koalicionit mes Komisionit të Rithemelimit, LSI dhe PDK.
Sipas tij, zgjedhjet e pjesshme vendore të 6 marsit janë antikushtetuese, ndërsa e konsideron si një lëvizje të presidentit Ilir Meta për “t’i ardhur në ndihmë” ish-kryeministrit Sali Berisha.
Për Patozin, të dyja palët e djathta që ndeshen sot për selinë e PD janë të rrënuara moralisht përballë demokratëve.
“Këto janë zgjedhje që nuk kanë asnjë lidhje me Kushtetutën, por janë thirrur si një lloj sondazhi për të prodhuar se kush e ka shumicën e pakicës. Është një lëvizje e Metës për t’i ardhur në ndihmë Berishës, i cili pas dështimit për të shtënë në dorë selinë e PD, e ka të vështirë për të vazhduar rrugën e tij politike me ‘Foltoren’…Unë gjykoj që të dyja palët që ndeshen sot për oborrin e PD janë të rrënuara moralisht përballë elektoratit të djathtë, pavarësisht përpjekjeve të tyre për t’i hedhur benzinë zjarrit që është shuar që më 9 shtator…Edhe mënyra sesi po sillen me LSI tregon hallin e tyre të madh. Aleancën me LSI-në e pranojnë vetëm fanatikët e PD. Edhe mënyra sesi po sillen ndaj LSI e shton edhe më tepër rënien drastike të reputacionet dy gjysmave të PD.”
Sa i përket shqyrtimit të çështjes nga Gjykata Kushtetuese për shkarkimin e presidentit Ilir Meta, Patozi vlerëson se dëmi është bërë, dhe se çdo vendim që do të merret, do të jetë i rëndë për shtetin dhe shoqërinë shqiptare.
“Drejtësia sillet sikur të jetë politike, kurse partitë politike japin drejtësi. Në këtë kontekst, është pak e vështirë për ta parashikuar. Ajo që kuptohet lehtë është reagimi negativ i Metës që e bën të besojë që është më afër shkarkimit sesa drejt vendimit të kundërt. Çfarëdo që të ndodhë, dëmi është bërë, për shtetin shqiptar të dyja vendimet janë të rënda. Nese Meta shkarkohet, mesazhi që do t’i jepet shoqërisë do të ishte që mazhoranca nuk pyet as për Presidentin, e jo më për faktorë të tjerë. Nëse Meta do të qëndronte, në Shqipëri, mjafton që të jesh në nivele të larta politike, e mund të bësh ç’të duash, nuk ndëshkohesh. Në të dyja rastet, shoqëria shqiptare ka humbur, shteti shqiptar ka një imazh të përmbysur, por mbetet për t’u parë.”
/b.h
