Kryeministri Rama, i ftuar në Studio e Hapur, ka folur edhe për ish-ministrin e Brendshëm Tahiri, lidhur me gjetjen e dy patentave të tij në makinën e një biznesmeni, ku u sekuestruan edhe 860 mijë euro.
Rama deklaroi se kjo çështje i takon prokurorisë dhe Tahirit, nuk më takon as mua, as qeverisë dhe as PS
“Kjo është një çështje që i takon prokurorisë. Nuk më takon as mua, as qeverisë dhe as PS. Është drejtësia që duhet të na thotë të vërtetën. Pas mbledhjes së grupit të PS, kjo është një çështje që i takon Tahirit dhe avokatëve të tij. Unë nuk jam avokat i Tahirit, as PS nuk është avokat i tij. Nuk kam dëgjuar një shpjegim racional për këtë çështje. Pata ndjesinë e një konfuzioni shumë të madh. Kjo mund të jetë shumë e rëndë, por edhe shumë pa lidhje” tha Rama.
Rama deklaroi se PS mori përgjegjësi të plotë politike lidhur me rastin. “Tahiri është jashtë grupit të PS si një deputet i lirë, të provojë pafajësinë e tij“, tha Rama.
Rama tha se në rast se faktohet akuzat, do të duartrokasë i pari triumfin e drejtësisë
“Në rast se faktohen akuzat, do të duartrokas i pari triumfin e drejtësisë. Nëse vërtetohet akuzat, ky do ishte turpi më i madh për PS këto 30 vjet, por nuk besoj“, tha Rama
Ai gjithashtu tha se nuk ka folur me Tahirin pas gjetjes së dy patentave në makinën e biznesmenit Sota, ndërsa ka nënkuptuar se nuk ka pasur asnjë lidhje mes kësaj çështjeje dhe largimit të tij nga qeveria në muajin maj.
Vasili: Keni folur me Tahirin pas çështjes Sota?
Rama: Jo…
Vasili: Nuk mendoni se duhej?
Rama: Për çfarë duhej?
Vasili: Nuk mendoni se duhet të dini pse ishin patentat e Tahirit në mesin e parave të Sotës?
Rama: Këto janë çështje të drejtësisë. Mund të kem 100 ide në mendje, por nuk kam kurajë t’ia them vetes kjo është kështu, siç bën shumica. Këto janë histori kazani. Historia e vërtetë është ajo që po zhvillohet në një proces hetimi dhe gjykimi. Duhet ta shkruajë prokuroria nga njëra anë me Saimir Tahirin dhe avokatët e tij, dhe në fund gjykata vendos cili është versioni i besueshëm.
Vasili: A dinit diçka për Tahirin që kur e larguat nga qeveria?
Rama: (Tund kokën dhe nuk përgjigjet, duke nënkuptuar “Jo”).
javanews/a.ç
