Një Komision i Pavarur i Kualifikimit, i cili do të veprojë dhe vendosë në mënyrë të pavarur, do të bëjë të mundur që të gjithë gjyqtarët, përfshi anëtarët e Gjykatës së Lartë dhe Gjykatës Kushtetuese, prokurorët, anëtarët e Këshillit të Lartë të Drejtësisë, Prokurori i Përgjithshëm i Republikës, si dhe këshilltarët ligjorë pranë tyre, të vlerësohen dhe rivlerësohen në mënyrë që të rivendoset besimi i publikut dhe besimi te këto institucione të rëndësishme demokratike.
Kjo është pjesë e ndryshimeve Kushtetuese që ekspertët propozojnë me qëllim rikthimin e besimit të qytetarëve tek drejtësia si dhe t’i jepet fund praktikave korruptive në këtë sistem.
Për këtë qëllim propozohet të krijohet edhe një Mision Ndërkombëtar Monitorimi, i cili do të jetë një bashkëpunim ndërmjet Komisionit Europian, Shteteve të Bashkuara të Amerikës, organizatave të tjera ndërkombëtare dhe asistencës ndërkombëtare dypalëshe, raporton gazeta “Mapo”.
Ky Mision ka të drejtë të emërojë vëzhgues ndërkombëtarë në të dyja shkallët e Komisionit të Pavarur të Kualifikimit. Brenda një muaji pasi është përcaktuar lista e kandidatëve, Kuvendi emëron me shumicë 3/5 Komisionerët e Shkallës së Parë dhe të Shkallës së Apelit, si dhe dy Komisionerët Publik nga lista e kandidatëve të paraqitur nga Avokati i Popullit.
Të gjithë komisionerët punojnë me kohë të plotë dhe nuk mund të ketë detyra ose punësime të tjera gjatë mandatit. Ata kanë të njëjtin status me atë të gjyqtarit të Gjykatës së Lartë, gjatë gjithë mandatit dhe do të kenë një pagë bruto prej 600 000 lekë në muaj.
Komisionerët, vëzhguesit ndërkombëtarë, personeli i Komisionit dhe familjet e tyre, gëzojnë mbrojtje të nivelit më të lartë, në pajtim me ligjin.
Ata kanë të drejtë të njihen me dosjet personale të personave të vlerësuar, të dhënat statistikore, dosjet e përzgjedhura për vlerësim, vetë-vlerësimet, opinionet e eproreve, të dhënat për trajnimet dhe ankesat, verifikimet e ankesave, vendimet disiplinore ndaj personit të vlerësuar, regjistrin e pasurive të paluajtshme dhe të luajtshme, llogaritë bankare, zyrat tatimore, bazat e të dhënave për regjistrimin e pronësisë së makinave, dokumentimin e kontrollit kufitar, si dhe çdo dokument tjetër përkatës.
