Ministri i Mbrojtjes së Greqisë, Panos Kamenos, i cili vetëm disa ditë më parë lëshoi deklarata kërcënuese në drejtim të Shqipërisë dhe Turqisë, pas tensionit të krijuar muajt e fundit në rajon, duket se i ka ulur tonet gjatë një ceremonie në brigadën e artilerisë në Atikë.
Kamenos ka thënë se Greqia nuk ka mbetur e paprekur nga “fishekzjarret” irrendentiste dhe revizioniste, si edhe nga problemet e terrorizmit por shton se shteti i tij “nuk ka qenë kurrë për luftë”, duket kjo një përgjigje për ministren shqiptare të Mbrojtjes, Mimi Kodheli, që në reagimi e saj shkroi “Jepini paqes një mundësi” , raporton Neësbomb.al.
“Greqia nuk ka qenë luftarake. Dhe nuk është. Këtë le ta dëgjojnë disa në lindje, por edhe në kufijtë tanë veriorë”, ka thënë ministri grek i Mbrojtjes, Kamenos.
Ai shtoi më tej se “Ne investojmë përmes forcave tona të armatosura, fuqizimin e tyre, kapacitetin luftarak të tyre, në paqe dhe jo luftë”.
“Forcat e armatosura janë faktor që garantojnë unitetin e nevojshëm, duke u deklaruar të gatshëm, në çdo orë dhe çdo ditë për të mbrojtur të drejtat e vendit tonë dhe interest e popullit grek, që rrjedhin nga traktatet ndërkombëtare nga të cilat nuk do të tërhiqemi kurrë”, ka thënë më tej ai.
