Bashkimi Evropian dhe Kuba kanë nisur sot një fazë të re bisedimesh gjatë të cilave do të përqendrohen në aspektin delikat politik në kuadër të afrimit të tyre.
”Gjatë 48 orëve diskutime, dy palët duhet të mbyllin kapitujt për bashkëpunimin dhe tregtinë dhe të fillojnë diskutimin për çështjen e dialogut politik”, njoftoi media shtetërore kubaneze.
Duke përfituar nga dinamika e krijuar nga afrimi me SHBA-në, Havana dhe Brukseli kanë vendosur si objektiv të arrijnë para fundit të vitit një kornizë të dialogut politik dhe bashkëpunimit që do të normalizonte marrëdhëniet e tyre.
Megjithatë, një zyrtar i lartë evropian theksoi javën e kaluar se palët do të kishin probleme për shkak të vështirësisë për të respektuar këtë afat pavarësisht avancimeve mbi çështjet tregtare dhe ekonomike.
Në përfundim të një seance negociatash në muajin qershor, mosmarrëveshje ekzistonin veçanërisht në çështjet lidhur me të drejtat e njeriut.
“Mosmarrëveshjet nuk janë të reja dhe nuk janë zbuluar në qershor. Ne jemi dakord për shumë pika, por mbi tema të tjera ne jemi deri tani dakord mbi mosmarrëveshjet tona”, theksoi kreu u përfaqësisë së Bashkimit Evropian në Kuba, Herman Portocarero duke iu referuar çështjes delikate për të drejtat e njeriut.
“Ne po kërkojmë një ekuilibër mes të drejtës ndërkombëtare përsa i përket të drejtave themelore (…) dhe qëndrimit kubanez të përqendruar më shumë në të drejtën kushtetuese dhe sovranitetin kombëtar”, theksoi Portocarero.
