Kryeministrja italiane Giorgia Meloni ka riafirmuar angazhimin e Italisë për të përmbushur detyrimet ndaj NATO-s, duke theksuar se rritja e investimeve në mbrojtje do të bëhet në mënyrë të qëndrueshme dhe gjithmonë në funksion të interesit kombëtar.
Në përfundim të samitit të NATO-s në Ankara, Meloni foli për prioritetet e qeverisë së saj, marrëdhëniet me presidentin amerikan Donald Trump, situatën shqetësuese në Iran, mbështetjen për Ukrainën dhe kritikat e opozitës italiane.
“Ne duam të respektojmë angazhimet tona për shpenzimet në mbrojtje. Po e bëjmë këtë dhe do të vazhdojmë ta bëjmë, por në mënyrë të qëndrueshme, duke përcaktuar vetë kohën, mënyrat dhe prioritetet sipas kontekstit.” Kështu u shpreh kryeministrja e Italisë, Giorgia Meloni, gjatë konferencës për shtyp në përfundim të samitit të NATO-s në Ankara.
Meloni theksoi se investimet në mbrojtje duhet të përkthehen në përfitime konkrete për Italinë. Sipas saj, fondet e destinuara për sektorin e mbrojtjes duhet të mbeten në vend, duke mbështetur industrinë italiane, kërkimin shkencor dhe zhvillimin e territoreve.
“Investimet që bëjmë duhet të mbeten në Itali, në fabrikat tona, në qendrat tona të kërkimit dhe në territoret tona. Kjo do të thotë më shumë siguri, por edhe më shumë vende pune të kualifikuara, më shumë kërkim dhe jo çeqe që përfundojnë jashtë vendit,” deklaroi ajo.
Lidhur me sulmet dhe kritikat e përsëritura të presidentit amerikan Donald Trump gjatë javëve të fundit, Meloni u shpreh se nuk është penduar për asgjë nga qëndrimet e saj.
“Nuk pendohem për asgjë që kam bërë. Nuk do ta ndryshoj strategjinë time. Investimin politik e kam bërë sepse besoj në unitetin e Perëndimit. Nuk është një strategji që ka lindur me ardhjen e Trump, por është qasja që kam me të gjithë bashkëbiseduesit e mi. Me Trump kemi afërsi në disa tema, si emigracioni apo kultura ‘woke’. Gjërat po zhvillohen siç i kemi parë, por unë nuk ndryshoj mendim,” tha ajo.
Në përfundim të samitit, të cilin e cilësoi “të shkurtër, por intensiv”, Meloni ritheksoi se NATO mbetet një aleancë e bashkuar dhe e vendosur për të forcuar kapacitetet e saj.
“Besoj se ky është mesazhi më i rëndësishëm i samitit të Ankarasë. NATO është një aleancë e bashkuar, e vetëdijshme për sfidat që ka përpara dhe e vendosur të forcohet. Italia i ndan plotësisht këto objektiva dhe këtë qasje. Në samit kemi paraqitur një ide shumë konkrete të sigurisë, një siguri që nuk lidhet vetëm me ekuilibrat gjeopolitikë, por prek drejtpërdrejt jetën e përditshme të qytetarëve,” u shpreh kryeministrja.
Ajo bëri të ditur se Italia mori pjesë në samit me investime në mbrojtje dhe siguri që arrijnë në 2.8 për qind të Prodhimit të Brendshëm Bruto, duke theksuar se vendi është një aleat i besueshëm brenda NATO-s.
“Italia ofron më shumë personel ushtarak se kushdo tjetër,” deklaroi Meloni.
Kryeministrja foli edhe për ndryshimet që po sjell teknologjia në fushën e mbrojtjes. Ajo theksoi se një tank që kushton miliona euro mund të shkatërrohet nga një dron me vlerë vetëm 20 mijë euro dhe se një operator i trajnuar për të pilotuar dronë në distancë mund të jetë më vdekjeprurës sesa një snajper.
Sipas saj, rritja e shpenzimeve për mbrojtjen nuk mjafton nëse nuk shoqërohet me kontrollin e zinxhirëve strategjikë të furnizimit.
“Nëse rrisim burimet financiare pa zgjidhur çështjen e kontrollit të zinxhirëve themelorë të mbrojtjes, rrezikojmë të paguajmë për të financuar varësinë tonë,” paralajmëroi ajo.
Meloni theksoi se busulla e vetme e qeverisë së saj mbetet interesi kombëtar.
Duke folur për zhvillimet në Lindjen e Mesme, kryeministrja u shpreh e shqetësuar për situatën në Iran.
“Nga Irani po vijnë lajme shumë të këqija,” deklaroi ajo, duke shtuar se qëndrimi i Italisë lidhur me përdorimin e bazave ushtarake italiane mbetet i pandryshuar.
“Qëndrimi ynë për përdorimin e bazave tona është i qartë dhe do ta ruajmë,” theksoi Meloni.
Sa i përket Ukrainës, ajo konfirmoi mbështetjen e plotë të Italisë, por sqaroi se në takimin me të ashtuquajturit “Vullnetarët” do të marrë pjesë ministri i Jashtëm Antonio Tajani.
“Kjo nuk është shenjë mosangazhimi. Kam marrë pjesë në disa samite ndërkombëtare dhe kam detyrimin të merrem edhe me shumë çështje të tjera në Itali,” shpjegoi ajo.
Në fund të konferencës, Meloni iu përgjigj edhe kritikave të opozitës italiane, e cila e akuzon qeverinë se po heq fonde nga shëndetësia për t’i orientuar drejt mbrojtjes.
“Të thuash se po u heqim financime spitaleve për të rritur shpenzimet për armët është qesharake. Nëse na jepet një hapësirë fiskale për të rritur kapacitetin tonë mbrojtës, unë do ta shfrytëzoj atë pikërisht për të rritur mundësitë dhe sigurinë e Italisë,” përfundoi kryeministrja Giorgia Meloni.
