Vajzat kanë një forcë të jashtëzakonshme edhe në sportet luftarakae që zgjedhin të ndjekin. Pavarësisht paragjykimeve të shumta, ato kurrë nuk dorëzohen, përkundrazi ecin përpara duke i sjellë vendit tonë dhe medalje.
Shembulli konkret është Esmeralda Novruzaj, e cila arriti të fitojë medaljen e bronzit në Kampionatin Europian të zhvilluar në Sofje të Bullgarisë. Ambiciet e saj tani janë zhvendosur te Botërori, një tjetër kompeticion madhor ku kërkon të lërë shenjë, shkruan A2.
Ajo stërvitet çdo ditë me dëshirën dhe ëndrrën për t’i sjellë Shqipërisë edhe më shumë medalje, edhe pse mbështetja që i është dhënë ka qenë minimale.
Edhe sipas trajnerit të Esmeraldës, Sead Bushatit, pritshmëritë nga boksierja shqiptare janë të mëdha. Sipas tij, boksi shqiptar ka regjistruar shumë suksese në vitet e fundit, ndonëse jo gjithmonë kanë marrë vëmendjen e duhur.
Esmeralda Novruzaj preferon që më shumë të flasë në ring se para kamerave. Një vajzë në moshë të re me një forcë të jashtëzakonshme dhe që premton se do të ngrejë lart flamurin shqiptar në çdo kompeticion ku merr pjesë.
