Parlamenti i Kroacisë ka miratuar qeverinë e re të qendrës së djathtë, të udhëhequr nga kryeministri Tihomor Oreshkoviç. Qeveria, e cila ka marrë mbështetjen e 83 deputetëve nga 151 të pranishëm, është miratuar të premten vonë, pas një debati prej 14 orësh.
Qeveria e re do të përballet me sfidat e rritjes së dobët ekonomike, pas gjashtë vjetësh radhazi në recesion, si dhe me fluksin rekord të migrantëve. Oreshkoviç, i cili ka lindur në Kroaci, por është rritur dhe arsimuar në Kanada, ka thënë se qeveria e tij do të jetë e gatshme të marrë vendime të vështira.
Kryeministri i deritashëm kroat, Zoran Millanoviç, i ka dorëzuar detyrën pasardhësit, duke i uruar sukses në punë. Kroacia është anëtarja më e re e Bashkimit Evropian dhe po ashtu në mesin e ekonomive më të dobëta në bllok.
