Veprimet e fundit të presidentit të Kosovës, Hashim Thaçi, po shikohen me pakënaqësi të madhe jo vetëm tek ambasadorët e vendeve perëndimore në Prishtinë, por edhe në kryeqendrat kryesore, duke përfshirë Washingtonin dhe Brukselin.
Kështu ka thënë një burim diplomatik perëndimor, i cili ka preferuar të flasë me kusht të anonimitetit.
Sipas këtij burimi, zyrtarë të SHBA-së dhe ata të NATO-s janë hidhëruar me iniciativën e Thaçit për transformimin e FSK-së në ushtri përmes ligjit, pa pajtimin e aleateve amerikanë dhe të atyre të NATO-s, shkruan Koha Ditore.
Për më tepër, burimi tha se përllogaritjet e Thaçit, se “është aq i rëndësishëm për Perëndimin sa do ta shpëtojmë prej gabimeve të tij, do të dalë krejtësisht e gabueshme”.
Thaçi, të premten, paralajmëroi se në rast se Kuvendi i Kosovës nuk e voton Ligjin për transformimin e FSK-së në forcë me mandat të ushtrisë, ai do të japë dorëheqjen.
Në intervistë për RTK-në, Thaçi ka thënë edhe se në rast se Kuvendi nuk e voton këtë ligj”, duhet të shkoj në shtëpi”. (b.an)
